ATI padayon sa pagpahigayon og Awareness Caravan kabahin sa RCEF

Padayong nagpahigayon og Awareness Caravan ang Agricultural Training Institute kun ATI dinhi sa Visayas State University kabahin sa Rice Competitiveness Enhancement Fund kun RCEF. Kini alang sa tanang mag-uuma og humay sa Silangang Kabisay-an sa dili pa mahuman ning tuiga.

Mao kini ang gibutyag ni ATI-Regional Training Center 8 Information Officer 2 Melinda Petalcorin diin tumong niini nga mahatagan og kasayuran ug matabangan ang mga rice farmers nga makadungan sa kumpetensya sa ubang mga nasud sa natad sa kita ug dekalidad nga produkto sa humay.

Matud pa, ang RCEF usa ka programa sa Department of Agriculture nga namugna tungod sa Republic Act 11203 kun Rice Tariffication Law diin tumong niini nga mapahamtangan og taripa ang mga imported rice. Sa maong paagi, mahimong magamit sa mga local farmers ang tax niini aron gastuhon sa pagpananum og mga high-breed nga humay.

Gisugdan niadtong buwan sa Setyembre ang maong Awareness Caravan sa Abuyog, Alang-alang, Ormoc City ug Naval Biliran. Karong Oktubre, lain na usab nga mga lungsod sa Samar ug Southern Leyte ang hatagan og serbisyo, diin nagtarget sila og dos syentos ka mga mag-uuma nga musalmot niini.

Angayang masayran nga muabot og unom ka tuig ang pagpatuman sa maong proyekto aron makita gayud ang kalampusan niini.

Cyril Montero, Kalambuan News