VSU naglagda og partnership sa Tottori University sa Japan

Subling nakabaton og bag-ong partner institution ang Visayas State University gikan sa nasud sa Japan.

Ning bag-ohay pa lang, naglagda og Memorandum of Agreement (MOA) isip partners ang VSU ug ang Tottori University. Kini na ang ikatulong partner institution sa VSU diin ang una mao ang Hiroshima University ug gisundan sa Nagoya University.
Angayang masayran nga mas gipakusgan pa sa VSU ang programa niini sa pakigtambabayong sa mga unibersidad gawas sa nasud isip paagi sa pagpalambo pa sa student ug faculty mobility overseas.

Gipahigayon ang virtual signing sa MOA tali sa TU ug VSU niadtong Hunyo kinse ning tuiga nga gifeature pa sa usa ka local Japanese television newscast.

Si TU President Dr. Hiromitsu Nakajima ug VSU President Dr. Edgardo E. Tulin ang nangulo sa ceremonial signing nga gisaksihan sa ubang opisyales sa duha ka unibersidad.

Ang MOA nagpalapad sa kasamtangang extension engagements tali sa duha ka tunghaan. Kini usab naghatag og higayon sa VSU ug TU nga magphigayon og mga aktibidad sama sa exchange professor programs. Lakip na niini ang mobility opportunity sa research scholars, undergraduate ug graduate students ug uban pang kalihukan sa pagdisenyo ug paggama og scientific materials.

Angayang masayran nga nakapadala na ang VSU og pipila ka mga magtutudlo niini sa Japan alang sa ilang graduate studies. Gani, si President Tulin nakakuha sa iyang doctoral degree sa Nagoya University niadtong 1993 lakip na ang iyang post-doctoral degree sa Iwate University niadtong 1995. (Orihinal nga gisuwat ni Ulderico Alviola)