CME Dean, napili isip miyembro sa CHED Technical Panel for Economics
Napili isip usa sa mga miyembro sa Technical Panel for Economics sa Commission on Higher Education (CHED) si Dr. Moises Neil V. Sereño kinsa ang Dean sa College of Management and Economics sa Visayas State University.
Gipangulohan sa mismong Chancellor sa University of the Philippines Los Baños nga si Dr. Jose V Camacho Jr., ang Technical Panel magsilbi isip advisory and recommendatory body sa CHED sa natad sa economics sa musunod nga upat ka tuig.
Lakip sa mga miyembro sa team gikan sa UPLB College of Economics and Management, Bangko Sentral ng Pilipinas (BSP), Philippine Institute of Development Studies (PIDS) ug ubang mga unibersidad sa nasud. Sila nanumpa sa usa ka virtual ceremony niadtong Hunyo siyete nga gipangunahan ni outgoing CHED Chairperson Dr. J. Prospero De Vera.
Sa iyang pakigpulong, gibutyag ni UPLB Chancellor Camacho masaligon nga ilang mahimo ang economics education roadmap aron mas maha-om pa kini sa panahon. Iya usab gipanghingusog ang katuyo-an sa Technical Panel sa musunod nga upat ka tuig.
Sa iyang bahin, si Dr. Sereño mapasalamaton sa suporta ug kumpyansa nila ni Chancellor Camacho ug CHED Chairperson De Vera. Gibutyag usab sa Dean kung unsa kamahinungdanon ang iyang pagka-apil sa CHED Technical Panel alang sa VSU.
Si Dean Sereño kasamtangan nagsilbi isip Associate Professor sa Department of Economics sa VSU. Nakuha niya ang iyang master’s degree sa International Development Program sa International University of Japan niadtong 2009 ug ang iyang doctorate degree in Economics sa University of Gottinger sa Germany niadtong 2014.
Siya usab ang Founding Director sa Visayas Socio-Economic Research and Data Analytics Center (ViSERDAC), usa sa tulo ka bag-ong natukod nga centers sa nasud nga gipondohan sa Philippine Council for Agriculture, Aquatic and Natural Resources Research and Development (PCAARRD). (Orihinal nga gisuwat ni Ulderico Alviola)
