VSU nakuha ang pinakataas nga lebel sa AACCUP institutional accreditation
Nakatala na usab ang Visayas State University og bag-ong record sa kasaysayan sa Accrediting Agency for Chartered Colleges and Universities of the Philippines AACCUP, ang pinakadakong accreditation body alang sa mga pampulikong kolehiyo og unibersidad.
Kini human makuha sa VSU ang pinakataas nga institutional status sa AACCUP sa Kabisay-an ug Mindanao.
Sa kasamtangan, duha ka unibersidad pa lang ang nakakuha sa Level 4 status sa AACCUP. Kini ang Tarlac State University ug Pangasinan State University sa Luzon. Bisan pa man og wala pa gipagawas ang mga marka, ang overall performance sa VSU giingong record-breaker diin halos tanang areas dul-an sa perpekto.
Ang AACCUP nag-ebalwar sa usa ka institusyon sa siyam ka areas nga mao ang governance and management; teaching, learning and evaluation; faculty and staff; research; extension, consultancy and linkages; support to students; library; infrastructure and other learning resources; ug quality assurance culture.
Base sa sumbanan sa AACCUP, ang institusyon mahatagan lang sa pinakataas nga Level IV kung makakuha kini og mean score nga 4.5 ug walay area nga ubos sa 4.0
Gi-aprobahan sa AACCUP Board of Trustees ang Level IV status sa VSU niadtong Hunyo baynte human sa validation visit sa piling research centers ug key offices sa tunghaan.
Sa iyang bahin, si VSU Quality Assurance Director Dr. Editha G. Cagasan nagpadayag og pasalamat sa tanang magtutudlo ug kawani nga mingtrabaho aron magmalampuson ang ikatulong institutional accreditation sa AACCUP.
Gikalipay usab ni VSU President Dr. Edgardo E Tulin ang resulta sa accreditation. Gibutyag niini nga ang maong kalampusan usa usab ka hagit aron mas palambuon pa sa tunghaan ang paghatag og serbisyo ug pagtuman sa mandato sa instruction, research ug extension.
Ang VSU nagpabiling consistent record holder sa AACCUP isip pinaka-unang institusyon sa nasud nga mipaubos sa institutional accreditation niadtong 2010. Ang VSU usab ang pinaka-unang institusyon sa nasud nga nahatagan og Leve III accreditation status niadtong tuig 2017.
