IHK, gisaulog ang ika-kwarentay sais nga anibersaryo pinaagi sa usa ka outreach program

Inay saulogon sa naandang mga socio-cultural ug sporting events ang anibersaryo niini, gisaulog sa Institute of Human Kinetics (IHK) sa Visayas State University ang anibersaryo niini pinaagi sa usa ka community outreach program sa mga komunidad nga apektado sa Bagyong Odette.

Muabot sa usa ka gatos ka kabataan edad singko ngadto sa dose anyos ang gipundok sa Multipurpose Court sa Barangay San Antonio, San Ricardo, Southern Leyte, aron sa mga aktibidad sama sa feeding program, mga paduwa, ug paghatag og basic school supplies.

Ang usa ka adlaw nga community outreach program sa IHK nga adunay temang “Kabataan: Paduwaon ug Lingawon, tuyong mahatagan og kalingawan ug pag-asa ang mga kabataan ug ilang pamilya human sa kadaot nga dala sa Bagyo niadtong Disyembre 2021.

Gawas pa sa IHK, ming-abag usab sa maong programa ang regional Criminal Investigation and Detection Group (CIDG) pinaagi sa paghatag og health and sanitary kits sa mga mingsalmot nga kabataan.

Gipadayag ni Dr. Charis B. Limbo, Director sa IHK, ang ka-importante sa pag-abag sa mga kabataan hilabi na sa mga lugar nga na-igo sa kalamidad aron matabangan sila nga ma de-stress ug makalimtan ang trauma nga dala sa katalgman.

Dugang pa sa IHK Director nga ang ilang community outreach program kaugalingon nilang pondo ug gikan sa mga donasyon sa mga faculty members sa IHK ug sa ilang mga higala.

Gawas pa sa outreach program, tipik sa pagsaulog sa ika kwarentay sais nga anibersaryo sa IHK mao ang pagpahigayon og mga Webinars mahitungod sa graphic arts and design principles sa garment production. Aduna usay webinar sa methods and strategies sa pagtudlo og physical education in the new normal.

Nahuman ang usa ka buwan nga anniversary celebration pinaagi sa usa ka virtual variety show nga nagpasundayag sa mga talento sa mga magtutudlo ug estudyante sa IHK. (Orihinal nga gisuwat nila ni Ulderico B. Alviola ug Neil Bryan Fulache/VSU Website )