USSC, target nga makaangkon og opisina karong school year!

Gitarget karon sa University Supreme Student Council kun USSC dinhi sa Visayas State University (VSU) nga makaangkon og kaugalingon ug permanente nga opisina dinhi sa tunghaan.

Gisaysay ni USSC President Chad Christian Wales nga duha na katuig nga walay opisina ang USSC humang mawala ang temporaryong opisina nila nga nahimutang sa VSU Administration Building tungod sa pag-renovate sa maong building.

Tungod niini, iyang gibutyag nga nasinati nila ang kalisod hilabi na sa pag-tipig sa ilang mga kabtangan sama sa ilang mga papeles o dokumento.

Lisod usab nga magtakda og mga impromptu meetings alang sa council kay wala silay kaugalingong opisina maong adunay panahon nga ipahigayon nila ang ilang panagtigom sa VSU Market o sa opisina sa ubang mga college council.

Dugang pa, wala usab nasayod ang mga magtutungha sa VSU kung asa moadto sa panahon nga aduna silay mga kabalaka o mga reklamo.

Nunot niini, nagpadangat siya og usa ka request sa mga kadagkuan sa VSU nga makaangkon og kaugalingong opisina lakip na ang pipila ka mga ekipo nga mahinungdanon sa mga operasyon sa USSC.

Samtang wala pa sila’y permanenteng opisina, ang presidente sa USSC nagkanayon nga mahimong mo-contact ang mga magtutungha kanila pinaagi sa ilang Facebook Page sa VSU Supreme Student Council o sa iyang numero 0920-231-2571.

Angayang masayran nga gawas sa pagtarget nga makaangkon og opisina karon nga school year, gipaambit ni Wales nga gipangandaman usab nila ang mga dagkong kalihukan alang sa mga estudyante sa VSU. Lakip na niini ang ilang General Information Quiz Show nga adunay dako nga premyo, USSC Talks nga magtuki og mga interesante nga mga tapik ug pipila ka mga social events. Perlyn Fernandez, Kalambuan News.