Ika-46 nga anibersaryo sa VFES, gisaulog online
Gisaulog sa mga kawani ug mga magtutudlo, uban ang mga tinun-an ug mga ginikanan, ang ika- cuarenta y sais nga anibersaryo sa Visca Foundation Elementary School (VFES) sugod niadtong Abril baynte nueve hangtud Mayo siyete niining tuiga. Ang tema sa maong kasaulogan mao ang “Sustaining Excellence in the New Normal.”
Matud pa ni Mrs. Corina M. Sacro, ang principal sa VFES, “Bisan pa sa kalisod nga giatubang niining panahon tungod niining pandemya, wala kini mahimong babag sa pagpadayun sa maong selebrasyon.”
Ang maong kasaulogan malampusong gipahigayon pinaagi sa sa Zoom, usa ka online platform, nga maoy nahimong instrumento aron makit-an kini sa mga katawhan, hilabi na kadtong adunay kalambigitan sa VFES, pinaagi sa FB page sa VFES.
Nagkadaiyang mga kalihokan ang gipahigayon aron mamahimong bibo ug puno sa pagtulun-an ang maong selebrasyon. Kini gilangkuban sa Family Tiktok Challenge, Family Run & Bond, Virtual Poster Making Contest, Convocation nga adunay tema nga “VFES Looking Back.” Sa Closing Program, gihimo usab ang pagpanghatag og awards ngadto sa mga chairmen ug director sa ViSCA Educational Foundation, Incorporated, ug ang raffle draw.
Niadtong Mayo sais gipahigayon ang Anniversary Convocation diin duha ka mga pinasidunggang mamumulong ang mihatag sa ilang mensahe. Kini mao sila Dr. Edgardo E. Tulin, ang Presidente sa Visayas State University, ug si Ms Darlyn Kristine Lauzon-Tecson, usa ka alumna ug kanhing estudyante sa VFES nga tua na karon nagtrabaho sa Estados Unidos.
Sa iyang pakigpulong, si Tulin mipadayag nga bisan pa sa kalisod nga giatubang sa atong nasud, siya mapasalamaton sa mga magtutudlo sa VFES sa makanunayon niining pagserbisyo ngadto sa mga estudyante. Siya usab mibati sa kasakit nga natagamtaman karon sa mga ginikanan tungod niining pandemya.
Bisan pa niini, iyang giawhag ang mga ginikanan, mga magtutudlo, ug mga estudyante nga kining COVID-19 pandemic nakahatag usab og mga oportunidad nga mabag-o ang kurikulum haum sa panginahanglan sa mga kabataan.
Samtang si Ms. Darlyn Kristine Lauzon-Tecson mipadayag nga bisan pa og nawala ang naandan nga pagkat-on tungod sa mga panghitabo nga dili mapugngan, makab-ot gihapon ang mga katuyoan basta maningkamot ug magpursige.
Sa maong convocation usab gihimo ang pagpanghatag sa mga plaque of appreciation ngadto sa mga tawo nga nagahatag ug padayun nga nagsuporta, ug ingon man ang mga miaging chairmen, ug principal sa administrasyon sa maong eskwelahan.
Agi’g pagtak-op sa selebrasyon, gihatag usab ang mga awards, prizes, ug certificates niadtong Mayo siyete sa mga misalmot sa mga pasundayag.
(Sinuwat ni Fred Leander M. Baldos, VSU-IHS HUMSS Student)
