PhilRootcrops nakadawat og accreditation gikan sa Bureau of Plant Industry isip plant nursery operator
Giila na sa Bureau of Plant Industry isip accredited nursery operator sa quality planting materials sa kamote ang Philippine Rootcrops Research and Training Center (PhilRootcrops) sa Visayas State University.
Kini na ang ikaduhang crop nga gi-accredit sa BPI sa PhilRootcrops diin ang cassava ang unang gi-sertipika niadtong 2017 ug na-renew niadtong 2020.
Ang BPI accreditation alang sa sweetpotato nursery gihatag niadtong Mayo traynta atol sa stakeholders’ meeting sa Barangay Cogon, Baybay City ug magpabiling epektibo hangtod tuig 2025.
Si kanhi PhilRootcrops Director Dr. Erlinda Vasquez ang nangulo aron makuha ang accreditation kauban si Mr. Dioscoro Bolatete kinsa senior agriculturist sa center.
Ang mga opisyal sa BPI gikan sa regional ug national offices nagpahigayon og validation visit sa newly-accredited sweetpotato nurseries isip tipik sa regular monitoring sa kagawaran.
Ang plant nursery accreditation ug planting stock certification giingong maayong stratehiya nga magpalambo ang taas nga kalidad sa seedling production ug maghatag og dakong higayon sa mga smallholders ug lokal nga komunidad.
Tumong sa plant nursery accreditation nga masiguro ang produksyon ug distribusyon sa dekalidad nga planting materials gikan sa rekomendadyong crop varieties ug species nga true to type ug wala peste ug mga sakit.
Gitataw ni Dr. Vasquez nga ang BPI Certification sa PhilRootcrops maghatag og higayon sa daghang ahensya ug grupo nga magkuha sa ilang planting materials gikan sa VSU.
Sa anam-anam nga pagluag sa mga travel restrictions, ang PhilRootcrops mas aktibo pa nga nakigtambayayong sa ubang mga government agencies sa Luzon ug Mindanao aron ma-promote ang rootcrops isip panginabuhi-an sa mga mag-uuma.
Angayang masayran nga ang planting materials gikan sa PhilRootcrops bag-ohay lang gipang-apud apud sa Southern Leyte isip tipik sa recovery programs nga gipangulohan sa provincial government aron marehabilitate ang mga komunidad human sa kadaot sa Typhoon Odette. (Orihinal nga gisuwat ni Joseph Kenneth M. Labastida)
