Mga bandera sa international partners sa VSU, gi-bida atol sa flag raising ceremony

Gi-isa sa pinaka-unang higayon ang mga bandera sa nasud sa mga international partners sa Visayas State University VSU, atol sa sinemanang flag-raising sa tunghaan niadtong Lunes, Hunyo trese ning tuiga.

Sigun ni VSU President Dr. Edgardo Tulin, ang makahuluganong seremonyas gibuhat aron sa pagpasidungog sa mga international partners sa unibersidad nga nahimong tipik sa paglambo sa VSU isip usa ka world class institution of higher learning.

Muabot sa dise sais ka buok bandera ang gi-isa lakip na ang flag sa international region blocks sama sa Association of Southeast Asian Nations ASEAN ug European Union kun EU.

Sagad sa mga bandera nga giisa nagagikan sa mga EU member countries sama sa Belgium, Croatia, Czech Republic, Germany ug Netherlands.

Lima usab ka mga bandera gikan sa Asian continent ang giisa atubangan sa VSU Administration Building sama sa China, Japan, Indonesia, Malaysia ug Thailand. Samtang duha gikan sa Oceanian continent nga mao ang Australia ug Fiji.

Ang bandera sa Estados Unidos ang nag-inusarang partner country sa VSU sa North ug South American continents.

Si Dr. Ana Marquiza Quilicot, Head sa International Affairs Office (IAO) nagkanayon nga aduna pay dugang bandera sa mga nasud ang i-isa aron maglangkob sa bag-ong mga partners sa unibersidad.

Sukad niadtong Marso ning tuiga, ang VSU ningdawat na og mga foreign professors ug students gikan sa Europa aron magpahigayon og face-to-face engagements isip tipik sa exchange mobility program sa Erasmus Mundus.

Dugang pa, usa ka propesor gikan sa nasud sa India ang gilaumang mu-abot sa VSU ning buwana aron magpahigayon og physical seminar kabahin sa virtual reality.