Proyekto sa VSU nga Green the Home palambuon sa Leyte

Buot karon sa Department of Agricultural Education and Extension kun DAEE dinhi Visayas State University nga mapalambo pa ang ilang Green the Home Project kun G-TH sa nagkadaiyang bahin sa probinsya sa Leyte sa dili pa mahuman ning tuiga.

Mao kini ang gibutyag ni DAEE Professor Karen Luz Teves diin naglaraw karon ang proyekto nga mabutangan og sistema sa panaghiusa imbes nga mag-iyahay sa pagpananom ang mga mag-uuma.

Matud pa, ang GTH usa ka programa nga nagdasig sa mga mulupyo nga magtanom og utanon sa ilang panimalay ug nataran bisan pa man sa kakuwang sa matamnang yuta.

Si Teves nagkanayon nga pinaagi sa mga meetings ug focused group discussions, iyang gidasig ang mga sakop sa G-TH nga magka-usa ug magtukod og asosasyon hinungdan nga natukod ang Green The Home Farmer’s Association.

Sa maong kondisyon, ang uchenta porsyento sa halin sa usa ka myembro, makuha niini samtang ang nahibiling baynte porsyento, ihatag ngadto sa asosasyon. Kini mahimong pondo sa tinguha nga adunay mahulam ang mga myembro niini panahon sa krisis.

Nasayran nga pormal nang giablihan niadtong miaging byernes ang unang display center sa Brgy. Marcos, ug planong ipadayon sa Brgy. Guadalupe ug sa onse ka mga barangay sa Hilongos, Leyte.

Ang maong display center mahimo nga sentrong baligyaanan sa nagkalain-laing klase sa mga utanon sama sa pechay, batong, atsal, kamatis ug uban pa.

Angayang masayran, nga pwede usab mamaligya sa center bisan dili myembro sa G-TH Farmer’s Association. Kinahanglan lamang niini nga maghatag ug baynte porsyento sa ilang halin ngadto sa asosasyon, aron padayon pa ang paglambo niini.

Cyril Montero, Kalambuan News!