Mga asawa sa mga mag-uuma sa Abuyog, nagpahigayon og feeding alang sa mga bata

Isip suporta sa ilahang mga bana, ang mga asawa sa mga mag-uuma nga miyembro sa Canario-Tabuige Irrigators Association Incorporated kun Can-Ta, nagpahigayon og feeding program sa kapin usa ka gatos (100) ka mga bata sa duha ka komunidad sa Abuyog ning bag-ohay pa lang.

Sayo pa lang sa buntag, naghikay na si Liza Sabundo alang sa paniudto sa iyahang bana ug sa mga kauban niini nga nagtanom sa ilahang basakan.

Sigun kang Liza, kinahanglan niyang makaluto og sayo aron masugdan na dayon ang pagpanghimo sa binignit nga maoy ipangapod-apod sa mga bata sa ipahigayong feeding sa hapon.

Si Liza ug ang uban pang mga asawa sa mga mag-uuma sa asosasyon ang nangunay sa pagpangluto ug pangpanghatag ning pagkaon ngadto sa kabataan sa Brgy. Balocawehay ug Brgy. Tabuige sa Abuyog.

Kining maong feeding, tinuig nang naandan sa asosasyon sa mga mag-uuma aron pagpasalamat sa mga komunidad sa ilahang hugot nga pagsuportar sa mga kalihukan sa grupo.

Human sa pagpakaon, aduna usay paduwa nga naghatag og dakong kalipay sa mga bata.

Nagpasinalamaton ang mga bata ug ilahang mga ginikanan ngadto sa asosasyon. (Maryjane Cubian/DYDC-FM Intern)