Mga estudyante sa Abuyog Community College gi-awhag nga magpabakuna

ABUYOG, LEYTE – Subay sa tuyo nga maandam ang mga magtutungha alang sa face-to-face classes, gi-awhag ang mga estudyante sa Abuyog Community College kun ACC nga makakuha na sa ilahang 1st dose aron maprotektaran ang kaugalingon batok sa Covid-19.

Karung adlawa, Nobyembre 9, 2021 nagmalampuson ang Local Government Unit ug QVac team sa Abuyog sa pagbakuna sa mga interesadong estudyante sa ACC sa pinaagi sa “first come first served” basis. Apil niini ang mga mulupyo sa lungsod ug nagpuyo gawas sa Abuyog nga nag-eskwela ning maong tunghaan. Aduna usay mga slots alang sa mga walk-ins sama sa mga senior citizen ug persons with disabilities PWD.

Ang mga bakunang Pfizer ug Sinovac ang gipangapod-apod alang sa tanan. Ang unang usa ka gatos (100) ka mga tawo sa pila, gihatagan pa og higayon sa pagpili sa klase sa bakuna nga ilahang nauyonan. Sumala kang Allysa Mae Remanes, usa ka estudyante sa ACC, alas syete pa lang sa buntag, nagkataas na ang pila.

Nagsugod pagrehistro ang taga LGU untop alas otso sa buntag ug human niini mao na dayun ang pagpangbakuna. “Taas ang pila, pero pagkahuman ug rehistro, mga 30 minutos ra nahuman nako”, matud ni Allysa nga gihisgutan ang pagkapaspas sa sistema ug dagan sa pagbakuna.

Sa sunod nga adlaw, Nobyembre 10, 2021, natakda usab nga mabakunahan gikan alas otso sa buntag hantud sa udto ang usa ka libong (1,000) nakakuha na sa ilang first dose sa Pfizer niadtong Oktubre 14. Human niini, musunod na dayun sa ala una sa hapon ang para sa second dose sa Sinovac nga bakuna. (Maryjane Cubian/DYDC-FM Intern)