Pag-abli sa Merida Infirmary Clinic, gi-selebrar sa mga Meridanhon
Gikalipay sa mga Meridanhon ang pormal nga pag-abli niadtong Nobyembre dise otso ning tuiga sa Merida Infirmary Clinic – Outpatient Department nga anaa nahimotang sa Upper Highway Poblacion ning maong lungsod.
Miduyog sa pagselebrar ang mga Meridanhon sa maong pag-abli nga gipanguluhan sa Merida Local Government Unit. Lakip usab nga mitambong ug mingduyog ang mga miyembro sa Sanggunian Bayan sa Merida, mga opisyales sa baynte dos ka barangay, ug ang mga espesyal nga bisita sa mga kasikbit nga lungsod.
Sa wala pa ang adlaw nga pag-abli sa edepisyo, nagpahigayon usa og on-site inspeksyon ang Committee on Health and Population sa maong infirmary para sa pag-andam ug pagtakda og adlaw nga pag-abli niini.
Nagtinguha nga mas mahatagan og dugang nga serbisyong medikal ang tanang lumulupyo sa lungsod bisan pa sa Rural Health Unit nga padayon nga mi atender sa katawhan.
Nagsugod sa paghatag og serbisyo ang infirmary niadtong Nobyembre bayte, ning tuiga. Aduna nay duha ka doktor nga na-asayin og mao kini silang Dr. Rashelle Mae Oyao ug si Dr. Jerry Penserga. Abli ang infirmary sa adlaw nga Lunes kutob Biyernes, gikan sa alas-otso sa buntag hangtod alas-singko sa hapon. (Jelyn Tumulak/DYDC-FM)
