Pagpangrehistro sa PhilID para sa nag-edad 5 anyos pataas sa Isabel, nagpadayon
Gisugdan niadtong buwan sa Oktubre ning tuiga dinhi sa Lungsod sa Isabel ang pagpangrehistro sa mga kabataan nag edad singko anyos pataas alang sa Philippine Identification System kun PhilSys.
Niadtong Agosto 2018, gipirmahan isip balaod ni Presidente Rodrigo R. Duterte ang Republic Act 11055, o ang Philippine Identification System Act, nga tuyong makamugna og usa ka national ID para sa tanang Filipino ug residenteng langyaw. Ang national ID usa ka pagmatuod sa pagka Filipino-citizen sa usa ka indibidwal. Pinaagi niini mas mapadali ang pampubliko ug pribadong mga transaksyon, pagpalista sa mga eskwelahan, ug pag-abli sa mga bank account.
Ang Philippine Statistics Authority (PSA) nagmarka sa laing milestone sa pagrehistro niini sa kapin sa 40 ka milyon nga mga Pilipino sa PhilSys. Sukad niadtong Oktubre 31, 2021, niabot na sa 40,264,550 ka mga Filipino ang nakakompleto sa ilang Step 2 registrations nga naglakip sa pag-verify sa demographic information sa nagparehistro ug pagkuha sa ilang biometric data, sama sa fingerprints, iris scans, ug atubangan nga mga litrato.
Sa Step 3 Registration operations, malampuson ang paghatod sa 3,102,751 Philippine Identification (PhilID) cards ngadto sa mga nagparehistro sa tibuok nasod pinaagi sa Philippine Postal Corporation (PHLPost), sukad niadtong Oktubre 31, 2021.
Sa baynte kwatro ka mga barangay dinhi sa Lungsod sa Isabel, dise siyete na ka Baranggay ang nahuman base sa gihatag nga scheduling sa matag barangay. Sa umaabot nga duha ka simana ipahigayon ang pag-parehistro alang sa barangay ang wala pa. Kini mao ang Bgy. Mahayag nga ipahigayon sa umabot nga semana Nobyembre 16-20 ug Brgy. Sto Rosario karung Nobyembre 22-24.
Base sa PHILSY’S Isabel Facebook post, nag pahibalo sila sa mga mulupyo sa Brgy Sto. NIÑO, nga magparehistro na, kay dili na sila maka balik og schedule sa maong barangay ug katapusan na kini na schedule sa maong barangay. Gihangyo usab ang mga mag-parehistro sa pag dala sa ilang original birth certificate ug school ID, ug kung wala mag dala lang ug sertipikasyon gikan sa barangay.
Gipahinumdoman usab sa munisipyo nga ang mga menor de edad nga nagparehistro kinahanglan nga ubanan sa mga guardian. Importante usab sa pag-suot sa tagsa-tagsa ka facemask ug faceshield inig mo adto sa espesipikong mga sentro sa pagparehistro sa matag-barangay. (Glesrilken Generale/DYDC-FM Intern)
