College Admission Test sa VSU, online na
Maayong balita alang sa buot mutungha sa Visayas State University kun VSU — ang premyadong unibersidad sa siyentia ug teknolohiya sa Kabisay-an!
Adunay bag-ong update nga gipagawas ang VSU website kagahapon diin matud pa, ipahigayon na pinaagi sa internet kun online ang VSU College Admission Test kun VSU-CAT. Kini agi’g pagsuod sa health protocols ug seguridad sa mu-take taliwa sa COVID-19 pandemic.
Ang aplikante kinahanglang mag-book og slot aron maka-take sa online exam platform. Ang exam ipahigayon sulod sa lima ka weekends o matag adlaw’ng Sabado og Domingo sa buwan sa Mayo hangtod Hunyo ning tuiga.
Sa pagsuwat ni’ng balita, gi-plantsa na sa VSU Admissions Office ang online platform diin i-dumala ang online application ug test appointment system sa mga mangindahay ug ipasabot kini sa buwan sa Abril.
Atol sa exam, kinahanglang mugamit og desktop computer o laptop nga adunay video camera ug microphone, Google Chrome web browser, ug stable nga internet connection.
Samtang naghuwat sa opisyal nga anunsyo sa mga sumbanan alang sa VSU-CAT 2021, gi-awhag na ang mga mangindahay nga mag-andam sa mga musunod nga dokumento:
Alang sa mga Senior High School Graduates o Graduating Students, kinahanglan ang Certification gikan sa School Principal nga mugradwar sa School Year 2020 to 2021; Certification sa grado nga anaay computed Grade Point Average (GPA) gikan sa Grades 9, 10 ug 11; ug Validated school identification card (ID).
Alang sa mga High School Graduates sa karaang Basic Education Curriculum, kinahanglan ang Form 138
Alang sa Alternative Learning System (ALS) Graduates, kinahanglan ang ALS Accreditation and Equivalency (A&E) rating.
Sa mga Transferees ug Second Coursers, gikinahanglan ang Certified true copy sa Transcript of Records (TOR); Certification sa grado nga naay computed Grade Point Average (GPA) gikan sa Grades 9, 10, ug 11.
Angayang masayran nga ang maong mga dokumento gikinahanglan da dili pa maka-book sa buot nga examination schedule.
Alang sa dugang kasayuran ug regular nga updates kabahin sa VSU CAT, i-like ug i-follow lang ang official social media accounts sa VSU hilabi na ang Facebook Page niini nga www.fb.com/visayasstateu.
