CHED Tulong-Agri Program, gipasabot sa mga estudyante

Gipasabot karon sa University Student Services Office kun USSO dinhi sa Visayas State University ang Tulong-Agri Program kun TAP nga programa sa Commission on Higher Education CHED.

Atol sa regular program sa USSO ning sibya-anan nga “ Serbisyo Estudyante” niadtong Nobyembre onse, gituki ni Mr. Junito Panonce kauban ang Dean of Students nga si Prof. Manolo Loreto Jr ang mga katungod ug prebilihiyo nga angay’ng mahibalo-an isip usa ka estudyanteng Pilipino.

Ang TAP nagtinguha nga makabenepisyo ang mga estudyante nga planong mag-enrol o nag-enrol na sa pagkakarun sa mga kursong Agriculture, Fisheries, Forestry, Agribusiness, Agricultural and Biosystems Engineering, Food Technology, ug Veterinary Medicine. Lakip na usab ang uban pang mga kurso nga adunay kalabutan sa agrikultura.

Matod pa ni Sir Panonce, tuition ug stipend for book allowance ug ubang bayronon sa eskwelahan ang mga posible nga madawat sa mga estudyante nga benepesyaryo ning maong programa.

Aron maka-apply ang usa ka estudyante sa maong programa, gikinahanglan nila nga magsumite og mga dokumento sama sa Certified True Copy of Grades ug Certificate of Indigency. Nunot niini, naghatag usab si Sir Panonce sa web link diin makita didto ang uban pa’ng requirements ug ang mismong online application.

Dugang pa, nagpahinumdom usab siya nga dapat ang aplikante walay laing scholarship gikan sa gobyerno ug ubang Local Government Unit (LGU) o gikan sa Department of Science and Technology (DOST).

Angayang masayran nga nahuman ang pagpangdawat sa aplikasyon alang sa TAP niadtong Nobyembre dose ning tuiga.Nagpasalamat usab si Panonce sa mga kawani sa DYDC ug ubang mga opisina ug kolehiyo nga mitabang sa pagpakaylap sa mga impormasyon ngadto sa tagsa-tagsa nga mga estudyante kabahin sa maong scholarship program gikan sa CHED. (Jessa Saladaga/DYDC-FM Intern)