Saktong pagdumala sa tubig sa umahan, gipasabot sa mga mag-uuma

Nahilakip sa teknolohiyang “Palaycheck System” ang Key check 6 diin gihataga’g importansya ang saktong pagduma sa tubig sa basakan. Kini nga hisgotanan mao ang gitudlo sa kapin baynte-singko (25) ka mga mag-uuma sa Canario-Tabigue Irrigators Association Incorporated sa Sitio San Vicente, Brgy. Tabigue, Abuyog Leyte.

Ang pag-edukar kabahin sa Palaycheck System ngadto sa mga mag-uuma naglarawnga madugangan pa ang ilahang kahibalo sa pagpananom og humay. Dugang pa, usa usab kini ka sistema nga mahimong mabuhat sa mga mag-uuma diin maibanan ang ila gasto  ug madungagan ang ilahang abot.

Matud pa ni Daclag, Nobyembre 3 ning tuiga nagsugod kining pabansay-bansay mahitungod sa siyam (9) kabuok nga Keycheck sa pagpananom og humay. Sa pagsuwat ning balita natakda ang Key check 6 kon ang saktong pagdumala sa tubig.

Si Vincent Mapili, research assistant sa NextGen Project mao ang resource person sa gipahigayong pagbansay-bansay. Labot siya sa grupo sa mga researchers nga nagtuon kung unsa sa mga bag-ong barayti sa humay nga gipananom sa lain-laing munisipyo sa Region-8 nga adunay pinakadakong abot.

Matud pa ni Mapili, ang eksaktong pagdumala kun ang kahibalo kung kanus-a dugangan o ibanan ang tubig sa humayan mao ang usa ka sekreto alang sa mabungahong pagpananom og humay. Dugang pa niini, gitudluan usab ang mga mag-uuma sa teknolohiyang “Alternate Wetting and Drying” kon AWD diin PVC pipe lamang ang materyales nga gamiton niini. Kining maong tubo ibutang lamang sa kada ektarya sa humayan ug pwede nang makontrol og mamonitor ang patubig sa basakan.

Natakda nga mahuman ang pagpanudlo sa siyam (9) ka Keycheck System karung buwan sa Nobyembre aron masugdan na ang pagbuhat sa mga nakat-unan sa mga mag-uuma ngadto sa basakan. (Maryjane Cubian/DYDC-FM Intern)