Palompon Kayak Paddlers, nanguna sa pag-abli sa Palompon Abre Grande Festival 2021

PALOMPON, LEYTE – Laing dakong kalihukan sa Silanganang Kabisay-an ang gipahigayon ning bag-ohay pa lang dinhi sa lungsod sa Palompon, Leyte.  Kini mao ang Abre-Grande Kayak Competition nga tipik sa tinuig nga paghandom sa lokal nga kagamhanan sa pag-igo sa Super Typhoon ‘Yolanda’ niadtong tuig 2013.

Ang lumba sa kayak ang usa sa mga aktibidades sa Abre Grande Sports Festival sa lungsod ug gipasiugdahan sa MEETO. Dungan sa paglunsad sa sports fest mao ang pagsugod sa usa ka buwan nga Lawig Festival isip pagsaulog sa kapistahan sa Palompon matag Disyembre tres.  

Karong tuiga, ang tema sa piyesta nagtinguha sa pagpalambo sa pagpanalipod sa kinaiyahan pinaagi sa eco-water sports ug pagdiskobre pag-usab sa prekolonyal nga kabilin sa lungsod sa paglawig ug maritime trading.

Ang kinyentos-metros nga lumba gipahigayon didto sa Tabuk Island Mangrove Park – Marine and Bird Sanctuary padulong sa duha pa ka dapit nga isla sa lungsod.

Dugang pa, gipasigarbo usab sa Palompon ang Tabuk Island Mangrove Park – Marine and Bird Sanctuary nga nanalipod sa mga residente gikan sa storm surge nga dala sa Supertyphoon Yolanda.

Tungod sa maong katalagman nga  ahitabo walo ka tuig na ang milabay, ang lokal nga kagamhanan nakahukom nga magtanom og daghang bakhawan sa mga dapit nga baybayon sa lungsod. (Hannah Rae Reyes/DYDC-FM Intern)