Mga sakit sa humay ug mga insektong muatake niini, gipahibaw sa mga mag-uuma sa Abuyog – DYDC 104.7 FM
NewsNews

Mga sakit sa humay ug mga insektong muatake niini, gipahibaw sa mga mag-uuma sa Abuyog

Nahuman na pagpananom ang sagad sa mga mag-uuma sa lungsod sa Abuyog alang sa wet cropping season. Insakto kining higayuna aron ipahibaw kanila ang hinungdan sa mga sakit sa humay ug mga peste nga dayon mu-atake human sa pagtanom.

Niadtong Disyembre uno ning tuiga gipahigayon ang pagbansay-bansay mahitungod sa PalayCheck 7 diin gipasabot ang saktong pagkontrolar sa mga peste nga muatake sa humayan. Kining hisgutanan mao ang gitudlo ngadto sa mga mag-uuma sa Can-Ta Irrigators’ Association Incorporated.

Gipangunahan ang maong pagbansay-bansay sa mga taga Regional Crop Protection Center kun RCPC sa Department of Agriculture Regional Field Office -VIII.

Usa nila si Lutgarda Francisco, Head sa DA-RCPC, ug ang resource person mahitungod sa mga peste nga muatake sa humayan. Samtang si Violeta Tiempo, Senior Science Research Specialist usab ang nag-edukar bahin sa mga sakit sa humay.

Nahibaw nang daan ang mga mag-uuma niining mga peste ug mga sakit nga gipanudlo. Apan, mao pa lamang ang ilahang pagkasabot nga adunay mga natural nga pamaagi sa pagkontrol niini.

Usa na nila si Antonio Cubian Sr., nagpangedaron og 76 anyos ug adunay kapin lima ka dekada nga eksperinsiya sa pag-uma.

Sumala kang Antonio, iyaha nang naandan ang pagpang-ispri og lainlaing kemikal kon adunay insekto ug mga sakit ang iyahang tanom.

Kining paagiha ang gilimitahan sa Integrated Pest Management o IPM diin uwahi nang buhaton ang pagpanggamit ug kemikal aron malikayan usab ang pagkadaot sa mga higalang insekto sa humayan nga maoy muunay pagpatay sa mga peste.

Ugsa mahuman ang pagbansay-bansay, si Francisco nagkanayon nga ang pinakaepektibong pamaagi aron malikayan ang pagkatap sa mga peste ug mga sakit sa humay mao ang adlaw-adlaw nga pagbisita sa basakan. Ug mao kini ang wala malimte ni Antonio tungod kay naandan na usab niyang susihon ang kahimtang sa iyahang mga tanom matag-adlaw. (Maryjane Cubian/DYDC-FM Intern)