“Zero-Waste Challenge”, ilunsad sa dakbayan!
Agi’g pagsaulog sa Earth Day 2021 karong Abril baynte dos, dos mil baynte uno, ilunsad sa dakbayan ang usa ka kalihokan nga giulohang Zero-Waste Challenge.
Gi-anunsiyo kini sa Baybay City Environment and Natural Resource (ENR) Office sa ilang official Facebook page niadtong miaging semana.
Ang Zero-Waste Challenge, ubos sa kampanya sa dakbayan kontra plastik.
Matod pa, makatabang ang maong kalihokan sa pagpakatap sa kasayuran sa pag-ban sa plastik ingon usab pagpataas sa kasayoran sa mga kabatan-onan sa Baybay bahin sa mamugnaong mga paagi aron maminosan ang ilang pagkonsumo sa plastic ug ilangkob sa ilang pang-adlaw-adlaw nga kalihokan ang mga kalihokang makaayo sa kalikopan.
Abli ang kompetisyon sa tanang mga Baybayanon.
Sa pagsalmot, kinahanglan lang mohimog tiktok video ang partisipante ang iyang zero waste day gamit ang iyang cellphone sa sulod sa says senta segundo.
Sa zero waste day, ipakita sa mga partisipante ang lain-laing mga alternatibo nila aron malikyan ang paggamit og platik sa ilang pagpangompra sa merkado ug uban pang establisemento dinhi.
Apan, gitataw sa mechanics sa kalihokan nga kinahanglang tinuod ug dili scripted ang transaksyon nga ilang ipakita sa video.
Mahimo usab nilang ipakita ang environment-friendly activities nga ilang gihimo apil na’ng mga kabag-ohang ilang gi-aplikar sa ilang routine nga adunay kalabutan sa pag-amuma sa kinaiyahan.
Usa ngadto sa duha ka mga partisipante ang gitugutang moapil sa matag entry ug mahimong mogamit sila og Cebuano o English nga pinulongan.
Ang entry sa mga partisipante kinahanglang isumite karong umaabot Abril baynte dos, kanus-a isaulog ang Earth Day, sa “Baybay City ENR Office” Facebook page, o personal nga ihatag ngadto sa ilang opisina sa City Hall.
Nasayran nga makadawat og ganti ang mga mananaog sa Zero Waste Challenge, 4000 Php alang sa 1st prize, 3000 Php sa 2nd, 2000 Php sa 3rd ug adunay lima nga makadawat og 1000 Php isip consolation prize.
Dugang pa, gamiton usab nga promotional videos alang sa Plastic Ban campaign sa dakbayan ang vlogs nga mopasundayag og maayong pananglitan.
