Viscan film-makers, nagkampyon sa national Klima Short Film Festival
Nakuha sa tulo ka mga estudyante sa Visayas State University VSU ang kampyonato sa national short film Klima Film Festival kun KKF ning bag-ohay pa lang.
Gisumiter sa MCDP Films ang ilang entry nga gi-ulohang “Viridescent” sa ikaduhang edisyon sa KKF nga gi-organisar sa Climate Change Commission (CCC) ug sa Oscar M. Lopez Center kun OML Center.
Sa gipahigayong awarding ceremony niadtong Marso onse pinaagi sa Facebook Live, nasakmit sa Viridiscent ang pinakadakong ganti lakip na ang Best Film, Best Climate Advocacy, Best Production Design, ug Best in Cinematography nga mingbalor og 115,000 pesos cash.
Gawas pa niini, nakadawat usab og pipila ka nominasyon ang pelikula sama sa Best Performance for Leila Amore Galvez isip si Dr. Leila Montesclaros, Best Director, Best Screenplay, ug Gender Responsive Award.
Angayang masayran nga ang maong team nga gilangkuban nila ni VSUIHS alumni Mr. Mikone Joshua Calungsod, Mr. Darwin Palermo ug Ms. Leila Amore Galvez mingsalmot na usab sa unang edisyon sa KKF diin napili sila isip runners up sa ilang entry nga “Verdant”.
Si Calungsod, kinsa mao ang director ug kasamtangang nagtungha isip 2nd Year BS Environmental Science student sa VSU, nagpasalamat sa suporta sa unibersidad diin sagad sa mga scenes sa maong entry gi-kuha sulod sa VSU Main Campus.
Dugang ni Calungsod nga bisan sa kakuwang sa mga kahimanan ug mga pagsuway sa pagmugna sa maong pelikula, malaumon kini nga maka-aghak siya sa uban nga musunod sa ilang passion.
Mapasalamaton usab si Calungsod sa Institute of Tropical Ecology and Environment Management (ITEEM), hilabi na kang Dr. Marlito Jose Bande ug Ms. Adelina Carreno sa Research and Extension office sa ilang suporta sa paghimo sa pelikula. (Orihinal nga sinuwat ni Neil Bryan B. Fulache/VSU Webteam)
