Mga barangay sa Merida, gi-abagan sa Municipal Agriculture Office ug PCC nga mapalambo ang industriya sa baka ug kabaw

Nagpahigayon og unom ka adlaw nga follow-up activity ang Municipal Agriculturist’s Office-Merida alang sa sa baynte dos ka mga barangay sa lungsod kabahin sa “Artificial Insemination, Pregnancy Diagnosis, Estrus Synchronization on Large Ruminants ug Livestock Animal Health Mission”.

Gisugdan ang maong kalihokan niadtong adlaw’ng Lunes, Nobyembre kinse diin nahuman kini niadtong adlawng Sabado, Nobyembre baynte, ning tuiga.

Kahinumduman nga niadtong Agosto baynte tres hangtod baynte nwebe ning tuiga, gihimo  ang pinaka-unang Mass Artificial Insemination (A.I.) Pregnancy Diagnosis (PD) Estrus Synchronization (ES) ug Livestock Health Mission sa lungsod.

Tuyo sa maong aktibidad mao ang pagpadaghan sa de kalidad nga liwat sa mga baka ug kabaw aron mas mapaayo ug mapadali ang lihok sa pagpang-uma.

Magkanunayong ming-abag sa maong kalihokan ang Philippine Carabao Center (PCC) ug and lokal nga kagamhanan sa lungsod sa Merida. Gipagawas na usab ang hulagway sa iskedyul diin makita ang gipanggahin nga adlaw para sa matag barangay nga naapil sa maong pagbansay-bansay.

Alang sa dugang kasayuran sa kalihokan, gi-awhag ang matag usa sa pagduol ug pakig koordinar sa ilang mga opisyales sa barangay. (Jelyn Tumulak/DYDC-FM Interns)