VSU, mupa-ubos sa pinaka-unang ISO 9001:2015 Surveillance Audit
Hapit na’ng makumpleto ang pagpangandam sa Visayas State University (VSU) Main Campus alang sa pagpa-ubos niini sa pinaka-unang Surveillance Audit sa ISO karong Pebrero kwatro ug singko ning tuiga.
Mao kini ang gibutyag ni VSU Quality Assurance Center Director Dr. Editha G. Cagasan atol sa DYDC Special Talk radio program niadtong Enero baynte nwebe ning tuiga.
Si Dr. Cagasan nagkanayon nga tinuig ang pagpahigayon sa surveillance audit sa ISO diin buhaton kini sulod sa tulo ka sunod-sunod nga tuig. Angayang masayran nga niadtong Pebrero 2020, nakuha sa VSU ang ISO 9001:2015 Certification gikan sa TUV Rheinland alang sa Quality Management Systems (QMS) niini.
Ang maong Surveillance Audit nakasentro sa mga sistema ug kabag-ohan nga gibuhat sa VSU sa milabay’ng tuig.
Ang una mao ang pagdugang o pag-utro sa organizational structure sa tunghaan diin adunay mga bag-ong buhatan ug mga posisyon sa tunghaan ang gihimo. Kini suta-on kung nagsunod ba (compliant) sa mga sistema sa ISO 9001:2015.
Ang ikaduha mao ang pagbag-o sa mode of instruction o matang sa pagtudlo diin inay face-to-face mode of teaching, gipatuman na sa tunghaan ang distance education, online ug paggamit og learning modules. Kini mao ang tubag sa VSU sa hagit sa COVID-19 Pandemic.
Nasayran nga ang ISO Surveillance Audit ipahigayon pinaagi sa online interview diin ang mga ISO auditors makighinabi online sa mga opisyal sa tunghaan ug mga kawani. Ang mga papeles ug mga gikinahanglang dokumento usab i-upload sa usa ka secured nga website nga gihimo alang sa maong audit diin mahimo kining matan-aw sa mga auditors.
Obserbaran usab sa mga auditors ang pagpahigayon sa online classes sa mga magtutudlo sa ilang mga tagsa-tagsa ka klase.
Sa pagsuwat ni’ng balita, nagpahigayon na og orientation ang QAC sa mga opisina ug mga kawani nga malakip sa maong audit aron mahibalo na sila sa dagan sa aktibidad. Matud pa, ipahigayon ang maong audit sa QAC Office, RDE Hall, ug sa mga nagkada-iyang departamento.
Gisiguro na usab sa Information and Communications Technology Management Center (ICTMC), Management Information System (MIS), ug VSU Powerplant nga stable ang internet connection ug walay mahitabo nga blackout atol sa ISO Audit.
Hingpit na usab ang pag-upload didto sa website sa mga required documents nga gikinahanglan alang sa audit.
Malaumon si Dr. Cagasan nga mahimong mabungahon ang maong ISO Audit ug matawag nga “ISO Compliant” ang tunghaan.
Si Dr. Cagasan nagkanayon nga imporante nga ISO Certified ang VSU kay kini nagpasabot nga dekalidad, standardized, ug husto ang pagpatuman sa mga proseso ug sistema niini.
Kinahanglan usab nga mupaubos sa ubang accreditations ang tunghaan aron mamentenar ang kalidad sa edukasyon nga gitanyag niini. (Buen Josef C. Andrade)
