Mental Health Awareness Month, gisaulog sa VSU
Gipangulohan sa Office of the Vice President for Student Affairs and Services ang pagsaulog sa Mental Health Awareness karong buwan sa Oktubre.
Pormal nga gi-ablihan ang kasaulogan kagahapon dinhi sa Visayas State University pinaagi sa usa ka Zoom Meeting nga gibroadcast usab sa Facebook Page sa VSU Student Services Office.
Ang tema karong tuiga mao ang Mental Health Care for All: Care for Yourself and Care for Others.
Sa iyang mensahe atol sa opening program sa Mental Health Awareness Month, gibutyag ni Dr. Daniel Leslie Tan ang, ang bag-ong Vice President for Administration and Finance, ang ka-importante sa pag-amuma sa mental health sa tunghaan.
Kini hilabi na nga apektado usab ang mga kawani ug estudyante sa tunghaan sa mga lockdowns ug uban pa’ng mga problema nunot sa COVID.
Sa iyang bahin, gipasabot usab ni Dr. Aleli Villocino, Vice President for Student Affairs and Services, ang paglunsad sa VSU Cares, usa programa nga gipanguluhan sa iyang buhatan alang sa mga estudyante.
Gilunsad usab kagahapon ang Self-Care Challenge: VSU Edition 2021 diin gi-awhag ang mga estudyante nga musalmot sa usa ka “7-Day” Self Care Challenge sugod Oktubre dose hangtod Oktubre dise nwebe. Karong adlawa ang deadline sa online registration aron maka-apil sa maong contest. Alang sa dugang kasayuran, mahimong mu-bisita sa Official Facebook Page nga VSU Student Services Office. (Buen Josef C. Andrade)
