Cebuana Lhuillier, usa na ka remittance ug payment partner sa VSU
Nagtambayayong ang Visayas State University ug Cebuana Lhullier, usa ka remittance and payment giant, aron mas mahimong sayon ug tuhay ang mga pinansyal nga transaksyon hilabi na taliwa sa COVID-19 pandemic. Kini aron mas mahatag pa usab og daghang kapili-an o payment options ang mga Viscans sa ilang transaksyon sa tunghaan.
Ang Cebuana Lhuller naila na sa tibuok nasud nga nagdalit og one-stop-shop nga serbisyo sa nagkadaiyang transaksyon sama sa pagprenda, pagpadala og kwarta, micor-insurance, micro-savings, ug business to business micro loan solutions.
Pinaagi sa dos mil kinyentos ka mga branches niini, ang Cebuana Lhullier ang usa sa pinaka-popular pawnshop chains sa nasud. Kini usab ang ikaduha nga non-banking financial institution nga nakigpartner sa VSU diin una niini ang Palawan Pawnshop niadtong Hulyo ning tuiga.
Apan bisan pa man kaniadto, ang Cebuana Lhullier ang nag-inusarang remittance ug payment center nga nagbutang og branch sulod sa VSU campus nga nagsilbi sa mga estudyante, faculty, staff ug ubang stakeholders sa VSU sa pipila ka tuig nah.
Samtang ang mga payments gamit ang electronic money ug ubang mga mobile wallets giplano pa sa unibersidad, ang online payments temporaryong ipaagi sa LinkBiz portal sa LandBank.
Gibutyag ni Ms. Queen-ever Atupan, Head sa VSU Cash Division, nga kasamtangang nangita og ubang posibilidad ang tunghaan nga makabayad pinaagi sa mobile wallets ang mga estudyante ug ubang kliyente.
Samtang adunay minimum charge nga baynte singko pesos matag transaksyon ang kolektahon sa mga buot mu-gamit sa payment service sa Cebuana Lhullier. Kinahanglan lang nga mufill-out og remittance ug payment form aron pagkumpleto sa proseso. (Orihinal nga sinuwat ni Ulderico B. Alviola)
