Biggest Loser VSU Edition, gisugdan karong adlawa

Pormal nga gisugdan karong adlawa ang Biggest Loser VSU Edition 2.0 nga usa ka indigay nga tuyong ma-engganyo ang mga entrante nga magpa-ubos sa ilang timbang ug mas mahimong mag-inampingon sa ilang panglawas.

Ang maong indigay abli sa tanang matutudlo ug kawani sa Visayas State University ug gipasi-ugdahan sa University Services for Health Emergency and Rescue (USHER) ug sa Institute of Human Kinetics.

Nahuman ang screening sa mga entrante kagahapong adlawa diin gisugdan kini sa milabay’ng semana. Karong adlawa ang pormal nga pagkuha sa inisyal nga timbang kun weigh-in ug ang pagsukod sa waistline diin gipahigayon kini ganinang buntag ug ganinang alas dos hangtod alas tres.

Sa pagsuwat ning balita, gipahigayon ang opening ceremony ug virtual orientation sa maong indigay pinaagi sa Zoom. Sa kinatibuk-an, ming-abot sa trayntay otso ka mga kawani ug magtutudlo ang misalmot sa maong indigay.

Nasayran nga ang Biggest Loser Challenge mudagan og tulo ka buwan diin timbangon pag usab ang mga entrante. Ang pinakataas og na-iban nga timbang maoy makadaog sa kinse mil pesos nga ganti. Anaa usay mga special prizes nga ihatag sa maong inidigay.

Gawas pa sa pag-iban sa timbang, aduna usay mga serye sa workout routines ug mga kaalam nga ipaambit ang USHER ug IHK aron mas ma-engganyo pa sila nga musunod sa healthy ug active nga lifestyle. (Buen Josef Andrade)