Baybay Comelec, gi-awhag ang publiko nga mupahimulos sa voter’s registration extension

Mahinungdakong Pahibalo gikan sa Commission on Elections (Comelec) Baybay!

Gilugwayan hangtud sa Oktubre traynta (30) ‘ning tuiga, ang Voter’s Registration diin mamahimong muadto sa buhatan sa Comelec Lunes hangtod Biyernes, gikan sa alas otso sa buntag hangtud sa alas singko sa hapon.

Sa gihatag nga lugway sa pagparehistro, wala nay registration sa adlaw’ng Sabado, gawas lang sa Oktubre 30, ang katapusang adlaw sa pagparehistro alang sa May 2022 elections.

Nunot niini, gibutyag ni Election Officer IV, Mr. Leonardo Dizon Jr. sa COMELEC dinhi sa dakbayan sa Baybay nga valid ID ang requirement sa mga new registrants ug sa mga mobalhin og laing presinto. Kini lakip usab ug sa mga magpa-reactivate tungod kay gitangtang na sila sa COMELEC sa master list of voters sa ilang barangay tungod kay napakyas man sila sa pagbotar sa nagsunod nga duha ka piniliay.

Samtang, gitataw ni Dizon nga authenticated birth certificate o marriage contract ang gikinahanglan sa mga botante nga adunay kinahanglan nga usbon sa ilang record sama sa spelling sa pangalan o apilyido, birthday o civil status.

Busa iyang gi-awhag ang mga kuwalipikadong botante sa pagparehistro na kon wala pa sila makaparehistro o kon nawala na ang ilang pangalan sa Master List of Voters sa ilang barangay, kay na-deactivate man sila. Ang buhatan sa Comelec Baybay anaa nahimutang sulod sa Baybay City Gym.