VSU Graduate School, planong patas-an pa ang enrolment sa mga foreign students

Nagtinguha karon ang Visayas State University (VSU) Office of the Graduate School (OGS) nga madugangan pa ang mga mu-enrol nga mga foreign students sa tunghaan.

Mao kini ang gibutyag ni VSU Graduate School Dean Dr. Anabella B. Tulin atol sa programang DYDC Special Talk niadtong Hunyo otso dos mil byante.

Si Tulin nagkanayon nga sa pagkakaron, gamay pa nga foreign students ang nag-enrol ug kinahanglan kini aron mas mutaas ang QS World University rankings diin nakadawat lang og three stars ang VSU karong tuiga.

Sa sunod nga semestro, magtanyag ang unibersidad og mga scholarships ug grants sa mga graduate students aron maka-agni pa og mga foriegn students.

Dugang pa, gibutyag ni Tulin nga aprobahan na lang sa Commission on Higher Education (CHED) ang mga gisugyot nga dugang mga programs offerings sa VSU sa PhD ug Masters Degree.

Gipadayag usab ni Tulin nga sukad sa iyang paglingkod isip Dean, aduna nay mga pisikal nga kausaban ug dugang mga gamit ang OGS alang sa mga graduate students. Mingtaas usab ang enrollment gikan sa 200 ngadto sa 400 ka mga graduate students ug buot pa niining mapadaghan ang mga enrollment.

Usa usab sa mga plano ni Tulin mao ang pagtukod og Open University aron mas daghan pa ang maka-enroll sa tungaan.