PCC-VSU, mohatag og libreng gatas alang sa mga malnourished nga kabataan sa Baybay!
August 24, 2020
Libreng gatas sa kabaw ang ipang-apod-apod sa Philippine Carabao Center- Visayas State University kun PCC-VSU alang sa mga malnourished nga mga kabataan dinhi sa dakbayan sa Baybay.
Mao kini ang gibutyag ni Officer-in Charge Center Director Dr. Ivy Fe Lopez sa sinemanang programa sa ilang ahensya sa sibyaanang DYDC-FM nga “KAhiBAW KA?”.
Sakop sa ilang feeding program ang kapin dos mil ka mga estudyante sa elementarya sa dakbayan nga ubos sa kategoryang severely wasted ug wasted base sa rekord sa City Health.
Mao kini ang mga kabataan nga mga malnourished labi na ang adunay timbang nga wala nakaabot sa angayan nga timbang sa ilang edad tungod sa dili maayong nutrisyon.
Gitataw ni Dr. Lopez nga makatabang ang gatas sa kabaw aron mahimong himsog ang mga kabataan tungod sa daghang nutrisyon nga anaa niini sama sa calcium ug mga minerals nga magnesium, potassium, ug phosphorus.
Dugang pa, taas ang fat content niini apan ubos ang kolesterol nga maayo alang sa kahimsog sa mga bukog, ngipon, kasing-kasing ug pagtaas sa timbang.
Nunot niini, niadtong Hulyo dise says ning tuiga, gipahigayon sa PCC-VSU ang Memorandum of Agreement Signing sa feeding program uban ang Department of Education (DepEd) Baybay City Division.
Gikatakda untang ipang-apod-apod ang mga gatas karong umaabot Agosto baynte kwatro, dungan sa pagpang-apod-apod sa mga magtutudlo sa mga modules ngadto sa mga kabataan.
Apan, kanselado kini tungod sa gipagula nga memorandum sa Malacañang mahitungod sa pag-uswag sa klase sa DepEd sa Oktubre singko dos mil baynte.
Nasayran nga Chocomilk ang partikular nga gatas nga ipang-apod-apod sa PCC-VSU aron mas madani pa og inom og gatas ang mga kabataan.
Gawas sa pagtabang sa kahimsog sa mga kabatan-onan sa dakbayan, tumong usab sa feeding program nga ma-promote ang gatas sa kabaw ug uban pang mga produkto sa Baybay Dairy Cooperative ug PCC.
