Mga estudyante sa VSU, mabakunahan na sugod sunod semana
Maayong balita alang sa mga VSU Students!
Tanang mga estudyanteng nagpuyo duol sa Visayas State University Main Campus ning dakbayan sa Baybay ug mga kasikbit nga lungsod adunay nay higayon nga mabakunahan sa mga musunod nga adlaw.
Mao kini ang gipasabot ni VSU President Dr. Edgardo E Tulin sa University Services for Health, Emergency and Rescue (USHER) human sa pakigpulong niini sa mga opisyal sa Department of Health Region 8 ug Commission on Higher Education Regional Office 8.
Sa taho nga gimantala sa VSU website, ang tunghaan na mao ang unang higher education institution sa rehiyon nga magpatuman og school-based vaccination program alang sa mga magtutungha niini.
Si Tulin nagkanayon nga ang planong vaccination ipahigayon sa RDE Hall ug pangulohan sa DOH Eastern Visayas Staff inabagan sa medical staff sa USHER ug ang university security personnel.
Kung kini mahitabo, kini na ang unang higayon nga ablihan pagbalik sa VSU, human sa duha ka tuig, ang mga gates niini alang sa mga estudyante nga musalmot sa vaccination program.
Gibutyag usab sa VSU President ang posibilidad sa limitadong face-to-face classes nga magsugod sa Enero sa sunod tuig.
Gi-plano na usab sa VSU ug USHER ang umaabot nga student vaccination drive diin si Medical Officer III Dr. Christl Supnet-Guinocor mao ang focal person sa school-based vaccination program.
Dugang pa, ang tanang plano alang sa vaccination roll out sa mga VSU students gi-koordinar sa Baybay City Health Office pinaagi ni Dr. Jerome Profetana.
Sa iyang bahin, gibutyag ni Dr. Guinocor nga ang mga sakyanan sa VSU ipwesto sa guardpost ug maoy sakyan sa mga estudyante pasulod sa campus ngadto na sa vaccination site sa RDE Hall. Nakig-koordinar na usab sila sa Information and Communication Technologies Management Center (ICTMC) alang sa hapsay nga registration ug database management sa mga mabakunahan.
Sa pagsuwat ning balita, gi-finalize na sa Office of the Vice President for Student Affairs and Services (OVPSAS) ang lista sa mga estudyante nga makasalmot sa pinaka-unang vaccine roll-out sa sunod semana.
Ang listahan sa mga estudyante lakip na sa ilang vaccination schedule ipagawas sa mga official social media platforms sa VSU aron masiguro ang hapsay nga on-campus vaccination program.
Alang sa mga VSU students nga nagpuyo gawas sa Baybay City, ang USHER ug OVPSAS makig-koordinar sa mga lokal nga kagamhanan pinaagi sa DOH-Region 8 nga hatagan sila og prayoridad sa vaccine rollouts sa ilang mga lungsod.
Ang VSU component campuses sa Alang-Alang, Isabel, Tolosa, ug Villaba usab makapahimulos sa susamang on-site vaccination drive sa umaabot. (Orihinal nga gisuwat ni Ulderico Alviola)
