Mga barangay sa Lungsod sa Hindang nanguna sa pagpatukod sa water system alang sa katawhan

HINDANG, Leyte – Taliwala sa pandemya, padayon nga nagpatukod og imprastraktura ang usa ka kooperatiba nga makabenepisyo sa mga barangay niini. Kasamtangan gitukod og reservoir o tangke nga muhatag og abunda ug igo’ng  suplay sa tubig nga magamit  sa mga mulupyo sa upat ka barangay sa lungsod sa Hindang.

Human sa taas nga proseso sa pagplano sa maong water system niadtong Enero tuig dosmil desenuebe (2019), nahimong posible ang pagpatuman niini niadtong Hulyo ning tuiga pinaagi sa pagdumala sa San Vicente Ferrer Water Service Cooperative.

Nahimong dako nga isyu ang kakuwang sa suplay sa tubig sa pipila ka mga barangay sa Hindang og mao kini ang nag-awhag sa nahisgutang kooperatiba nga ipatukod ang water system. Ang reservoir niini magamit 24/7 ug makasuplay og singkwenta ka gallon nga tubig kada minuto, igo nga makatanyag sa tanang lugar nga sakop niini.

Ang upat ka barangay nga sakop sa water system mao ang brgy. San Vicente Ferrer, brgy. Doos del Norte, Brgy. Doos del Sur, ug Brgy. Bontoc. Ang eksakto nga lokasyon diin ipahimutang ang tangke anaa sa Brgy. Doos del Norte.

Nasayran nga sagad sa investors sa maong proyekto mao ang pipila ka mga residente gikan sa brgy. San Vicente Ferrer ug uban pang mulupyo sa Hindang lakip ang mga Hindanganon nga miyembro as SVF Association Manila.

Dugang pa ni Mr. Villas, kung makatigom og dugang nga investors ang maong kooperatiba, posible ang pagpalapad sa maong water system.

Gilaumang mahuman ug mapahimuslan sa mga konsumidor ang maong water system sa umaabot nga Mayo sa sunod tuig.

Alang sa Kalambuan News, Kini si Kim Christine S. Boja. VSU DevCom Intern. (Kim Christine Boja/DYDC-FM Intern)