Pamasahe sa mga traysikol sa nagkalainlaing lugar sa Abuyog, gipaubsan na – DYDC 104.7 FM
NewsNews

Pamasahe sa mga traysikol sa nagkalainlaing lugar sa Abuyog, gipaubsan na

Gipaubsan na ang pamasahe sa mga traysikol nga maoy popular nga matang sa pambublikong transportasyon dinhi sa lungsod sa Abuyog. Gikan sa singkwenta pesos, mahimo na lamang baynte pesos ang pamasahe sa pito ka kilometrong gilayuon nga pagbyahe.

Mahinumduman nga niadtong Abril, 2020 diin nigrabe ang pandemya, sobra pa sa doble ang gitaas sa pamasahe lungsod. Gikan sa 18 pesos, nahimo kining 50 pesos tungod kay tulo na lamang ang mamahimong isakay sa walo nga kapasidad sa traysikol.

Gisugdan pagpatuman kining pagpaubos sa pamasahe sa Lokal nga Kagamhanan sa Abuyog niadtong Nobiyembre 30, 2021.

Gikalipay kining balitaa sa kadtung mga walay pribadong sakyanan diin mukabat og 100 pesos ang paadto ug pabalik nga pamasahe sa traysikol.

Usa na niini si Rema Andriano nga nagpuyo og walo ka kilometro nga distansya gikan sa town proper. Sigun kang Rema, niadto siya sa town proper sa niaging Disyembre 2 apan wala pa sya nahibalo nga niubos na diay ang pamilete.

Dugang ni Rema, ang pagpatingadto sa town proper mao ang baynte pesos apan kwarenta kon tibalik na.

Gikompirma kini sa usa ka traysikol driver nga nihangyo sa dili pagpaila ug matud niya, kwarenta pesos ang tibalik tungod kay tulo lamang ang ilahang mamahimong isakay.

Giawhag usab sa Lokal nga Kagamhanan sa Abuyog ngadto sa publiko nga mamahimong isumbong kanila ang mga traysikol drayber nga dili mutuman sa gimandong pagpaubos sa pamilete. (Maryjane Cubian/DYDC-FM Intern)