Panagtigom alang sa pagpalambo sa industriya sa mais, gipahigayon sa Merida

Gipahigayon niadtong Disyembre tres, ning tuiga ang Site Working Group Meeting sa lungsod sa Merida aron hisgutan ang mga lakang sa pagpalambo sa industriya sa mais.

Gitambungan kini sa duha ka corn clusters nga anaa sa lungsod. Ang unang cluster gipanguluhan sa Mat-e Farmer’s Association. Sakop niini ang lima 5 ka barangay nga mao ang Cambalong,Tubod, Lundag, San Jose ug Calunasan. Ang ikaduhang cluster mao ang CASACALIMA Farmer’s Association diin sakop ang barangay Casilda, San Isidro, Can-unzo, Libas ug Mahayag.

Gipondohan ang maong programa sa Department of Agriculture- Regional Field Office VIII. Sakop sa panagtigom ang National Group Agencies (NGA), Provincial Agriculturist Office of Leyte, ug ang Municipal Agriculture Office (MAO) nga maoy nangulo niini. Gilangkoban usab ang marketing group sama sa San Miguel Foods Inc sa dakbayan sa Ormoc, Bontoc Chamber of Commerce and Industry ug ang lokal nga mamalitay sa produkto nga mais. Lakip na usab ang Benabaye Primary Corporation (BENAPRIMCO), usa ka micro finance institution nga anaa sa lungsod ug ang academe nga mao ang Visayas State University-Main Campus ug Isabel Campus.

Tungod sa apiki nga oras ug iskedyul, ang BENAPRIMCO lang ang nakaalagad sa panagtigom. Mihanyag sila ug loan program sa mga mag-uuma sa mais para sa pagsugod sa corn enterprise.

Usa ang Merida sa trese ka munisipyo sa probinsya sa Leyte nga adunay duha ka cluster sa mga mag-uuma sa mais. Si Mrs. Leah Agustin, usa ka aktibong miyembro sa Cambalong Famer’s Association nga nakatambong sa maong panagtigom nga gipahigayon. Ania ang tipik sa pakighinabi kang Mrs. Leah kabahin sa nahisgutang corn enterprise.

Dugang pa, nasayran nga magpahigayon pa og sunod nga panagtigom kabahin gihapon sa corn enterprise nga posibleng mahitabo sa sunod tuig. (Jelyn Tumulak/DYDC-FM Intern)