Mga serbisyo sa GSIS, mas dali na’ng mapahimuslan gamit ang mobile app
Maayong balita alang sa mga miyembro sa Government Service Insurance System!
Mas dali na lang nga makapahimulos sa serbisyo ug impormasyon sa GSIS ang mga empleyado sa gobyerno ug mga retirees pinaagi sa mobile app sa ahensya nga GSIS Touch.
Matud pa ni GSIS executive vice president for support services Dionisio Ebdane Jr, ang app nga gidebelop sa GSIS nagtugot sa mga miyembro ug pensioners niini nga ma-check ang ilang membership information sama detalye sa ilang loans, benefits, pensions ug mga produkto ug serbisyo sa GSIS.
Mamahimo usab nga mag-apply para sa loan ang mga miyembro gamit ang app.
Si Ebdane nagkanayon nga ang mga pensioners mahimo usab nga maka-set og schedule sa ilang Annual Pensioners Information Revalidation kun APIR gamit ang app. Kinahanglan lang nga ang mga GSIS members naay registered email address sa dili pa sila magdownload sa app pinaagi sa Android or Apple IOS.
Kung ma-download na ang app, si Ebdane nagkanayon nga ang GSIS member kinahanglan magbutang og password aron ma-access ang app.
Kung adunay mga problema ang miyembro sa pagdownload sa app, mamahimo lang nga mutawag sa GSIS 24/7 hotline nga 847-47-47 o mutan-aw sa tutorial video sa YouTube.
