VSU, magpahigayon og Virtual Singing Competition! – DYDC 104.7 FM
News

VSU, magpahigayon og Virtual Singing Competition!

Agi’g pagsaulog sa ika-97 nga anibersaryo sa pagkatukod sa Visayas State University (VSU) karong Abril baynte uno hangtod 28, ipahigayon sa tunghaan ang usa ka Virtual Singing Competition.

Ang maong indigay, usa sa mga highlight sa anibersaryo ug giulohang “Handog sa mga Frontliners: A Virtual Singing Competition”.

Matod pa, usa kini nga pamaagi aron pasidunggan ang mga frontliner nga mga Pilipino sa tibuok kalibutan nga nagpakita og kaisog sa ilang serbisyo bisan pa sa peligro nga dala sa COVID-19 pandemic.

Tumong usab niining mapasundayag ang talento ug kahanas sa pag-awit sa mga Viscans.

Abli ang indigay alang sa tanang high school ug college students, faculty ug staff sa VSU.

Kinahanglan lang isumite sa partisipante ang usa ka video-recording nga nagpakita sa iyang kaugalingon nga miawit samtang miduyog sa minus one o live accompaniment.

Usa lang ka song entry ang iyang awiton, mahimong Filipino o Ingles ang linggwahe, apan kinahanglang Original Pinoy Music (OPM) kini.

Gitambagan usab ang partisipante nga musuot og Filipino attire sa iyang recorded performance.

Ang video recording usab nga isumite, kinahanglang modagan og duha ngadto sa lima ka-minuto.

Ang deadline alang sa pagsumite sa girekord nga mga video entry uban sa Registration Form nga madownload lang sa VSU Page karong umaabot Abril dise nwebe.

Angayang masayran nga adunay duha ka lebel sa kompetisyon: ang Elimination Round ug ang Grand Finals.

Ipahigayon ang elimination round karong umaabot Abril baynte samtang ang Grand Finals ipahigayon sa Abril baynte syete ug i-livestream pinaagi sa Facebook ug Zoom, sa alas says ang takna sa gabii.

Ang mga palarong modaog sa sangka sa pag-awit makadawat og ganting salapi ug certificates.

Ang First Prize makadawat og PhP5,000 cash, ang Second Prize -PhP4,000  ug ang Third Prize, PhP3,000.

Samtang ang pitong dili maapil sa top 3, makadawat og PhP1,000 ug certificate isip consolation prize.

Sa dugang kasayuran, mahimong bisitahon ang Visayas State University Facebook Page.