Seguridad sa VSU mas gipahut-an human sa bomb threat

Mas gipahut-an na sa Visayas State University VSU ang seguridad sa tunghaan human ang nahitabong bomb threat dul-an usa ka semana na ang minglabay.

Atol sa Joint Flag Raising Ceremony sa unibersidad kagahapon sa buntag, gibutyag ni VSU President Dr. Edgardo Tulin ang mga lakang nga ilang gipatuman aron mas masiguro nga luwas sa mga hulga ang tunghaan.

Siya nagkanayon nga mas pahut-an pa ang seguridad sa mga main gates diin ang ubang mga gates sa tunghaan sirad-an. Magdugang usab ang VSU og mga security guards nga muhatag og seguridad sulod sa campus.

Pangayo-an usab og mga IDs ang mga sakyanan nga musulud ug hatagan og mga visitors passes. Ang mga sakyanan sa mga mulupyo sulod sa campus hatagan og mga vehicle passes.

Mas stikto na usab ang paggbantay sa Administration building diin naglaraw na ang VSU nga mupalit og mga metal detectors ug x-ray machine. Gitan-aw usab sa administrasyon nga ipahigayon sa gawas sa building ang mga frontline services niini.

Ipa-ilawom usab sa profiling ang tanang mga construction workers sa VSU lakip na ang mga mamaligya ug ambulant vendors aron mailhan sila.

Dugang ni Dr. Tulin nga magpahigayon usab og mga seminars kabahin sa bomb threat aron mas maandam pa ang mga tawo sa angay’ng buhaton.

Busa, aduna usay hangyo and presidente sa tanang mga nasakop sa VSU Community.

Kahinumduman nga niadtong Marso baynte siyete, nakurat ang mga estudyante ug mga kawani sa kalit nga pagkasuspenso sa klase ug trabaho tungod sa usa fire drill. Gi-evacuate gilayon sila sa luwas nga lugar ug gipapauli . Suspendido ang mga klase ug trabaho sa milabawy’ng Huwebes hangtod Domingo tungod sa maong bomb threat.