College Admission Test sa VSU, kasado na

Nagpadayon pa hangtod Marso trayntay uno ang pagpangdawat sa admission applications alang sa Visayas State University College Admission Test kun VSU-CAT sa mga buot mahimong freshmen college students ning tunghaan. Kini pinaagi sa CAT Admissions App.

Samtang, kasado na ang mga schedules sa pagpahigayon sa Online CAT pinaagi sa Moodle Platform. Ang mga schedules sa online exam ipahogayon matag adlaw’ng Biyernes ug Sabado sa buwan sa Mayo ug Hunyo. Kini mao ang musunod: May trese ug katorse, Mayo baynte ug baynte uno, Mayo baynte siyete ug baynte otso, ug Hunyo tres ug kwatro.

Atol sa sinemanang radio program sa VSU University Student Services Office nga Serbisyo Estudyante sa DYDC-FM, gibutyag ni Admissions Office Head Dr. Nancy Dumaguing nga mahimong madownload ang admissions app sa VSU-CAT webpage nga vsu.edu.ph/cat2022.

Si Dumaguing nagkanayon nga anaa sa maong webpage ang tanang impormasyon nga gikinahanglan alang sa mga incoming freshmen sama sa mga kursong gidalit sa tunghaan, mga procedure ug requirements sa VSU-CAT, mga schedules sa eksaminasyon ug mga frequently asked questions kabahin sa VSU-CAT. Naghatag usab og mga pahinumdom si Dr. Dumaguing sa mga buot mag-apply online.

Gipahimangno-an usab ni Dr. Dumaguing nga dili kalimtan ang mga email address ug examinee control number aron dili na malangan sa pagkuha sa exam.

Angyang masayran nga kini na ang ikaduhang higayon nga adunay online exam sa VSU-CAT nunot sa COVID-19 pandemic. Nunot usab sa free education program sa gobyerno, adunay quota system sa maka-enroll sa VSU maong gipahigayon ang College Admission Test ning tunghaan. (Buen Josef Andrade)