VSU Decso, magpahigayon sa pinaka-unang LGBTQ Pride March
Ipahigayon dinhi sa Visayas State University kun VSU ang pinaka-unang Pride March agi’g pag-ila sa LGBTQ Community o Lesbians, Gays, Bisexual, Transgender and Queer.
Ang maong kalihukan gipasigugdahan sa Development Communicators Society kun Decso ning tunghaan diin ipahigayon kini sa umaabot Marso baynte kwatro, adlaw’ng Dominggo. Magsugod ang maong parade sa alas singko y medya sa hapon atubangan sa Multimedia Development Center ning tunghaan.
Sigun pa sa Facebook post sa Decso, gi-awhag niini ang mga estudyante sa pagpakig-unong sa LGBTQ community pinaagi sa pagsalmot sa Pride March. Aduna usay premyo alang sa mga partisipante nga adunay pinaka-nindot nga outfits.
Nasayran nga tipik ang Pride March sa pagsaulog sa kapunongan sa Development Communication kun DevCom week sa sunod semana diin aduna kini temang “Future in Inclusiveness”.
Gawas pa sa Pride March, aduna usay mga nakalinyang kalihukan sa DevCom Week sama sa Eco Warden: Trashhtag Challenge, Spoken Word: Taktakan 2019, Photography and Art Contest ug Quiz Show nga How Well Do You Know About the Sustainable Development Goals.
