Online orientation gipahigayon alang sa mga estudyante sa VSU sa pag-pag-abli sa klase – DYDC 104.7 FM
NewsNews

Online orientation gipahigayon alang sa mga estudyante sa VSU sa pag-pag-abli sa klase

Kasamtangang gipahigayon dinhi sa Visayas State University VSU ang General Student Orientation nga tuyong ma-andam ang mga estudyante sa New Normal sa pagpahigayon sa klase karong school year 2020-2021.

Ang maong Orientation gisugdan ganinang buntag diin gilaumang mahuman kini ugmang adlawa Martes Agosto dise otso ning tuiga.

Sa duha ka adlaw nga training, tuyong mapasabot sa mga estudyante ang mga nagkadaiyang serbisyo sa tunghaan ug ang mga sumbanan sa New Normal. Tuyo usab nga mapasabot sa ikaduhang adlaw ang Online Learning Management Systems sama sa Google Classroom, Moodle, ug ang instructional materials alang sa remote learning.

Gipahigayon kini alang sa tanang estudyante sa VSU System lakip na ang mga component colleges diin live kining gi-broadcast sa official Facebook Page sa VSU.

Nasayran nga ang maong onboarding seminar gipahigayon aron mapasabot sa mga estudyante ang mga pagabuhaton hilabi na kay ang VSU magpatuman na sa “flexible learning”. Kini usab resulta sa mga gibuhat nga mga preparasyon sa pagdumala sa klase taliwa sa gitawag nga New Normal.

Ubos sa New Normal, gilimitahan ang face-to-face mode of instruction o pisikal nga pagklase sa tunghaan. Dugang pa, mamahimong mapahigayon ang klase pinaagi sa “online learning” ug asynchronous learning gamit ang mga learning materials nga ipadala sa mga estudyante aron tun-an.

Sa iyang welcome address, gidasig ni VSU President Dr. Edgardo E. Tulin ang mga estudyante nga magmalig-on ug dawaton ang bag-ong matang sa pagtudlo nga mao ang distance learning pinaagi sa online ug sa mga instructional modules. Gipadayag usab ni Dr. Tulin nga gibuhat sa VSU ang tanan aron padayon nga maghatag og de kalidad nga edukasyon bisan pa man sa panahon sa pandemya.

Gibutyag usab ni Tulin nga libre nga ihatag ang mga distance learning modules sa mga estudyante nga mingpili sa instructional materials isip mode of learning inay sa online. (Buen Josef C. Andrade)