Bagyo gawas sa PAR, gilaumang musulod unyang gabii o ugma!

Gibutyag sa Department of Science and Technology- Philippine Atmospheric, Geophysical and Astronomical Services Administration (DOST-PAGASA) nga ang bagyo nga gibantayan nila gawas sa Philippine Area of Responsibility kun PAR, posibleng musulod unyang gabii o ugma sa Biyernes, Abril dise says.

Sigon pa sa ilang Weather Forecast ganihang alas 10 sa kabuntagon, ang sentro sa bagyo naa sa gilay-ong 1,095 km sa Silangan dapit sa Mindanao.

Aduna kini kakusgon sa hangin nga moabot sa 95 km/h ug padayon pa kini nga mukusog, samtang ang pagharos sa hangin niini mokabat ngadto sa 115 km/h.

Nilihok kini pa-Kasadpan sa dyes kilometro matag oras. Kung musulod na kini sa PAR tawgon kining Bising, ang ikaduhang bagyo sa nasud karong tuig.

Bisan wala pa kini derekta nga epekto sa nasud, nakaapekto na ang trough o extension sa hangin ni Tropical Strom Surigae, international name sa bagyo, sukad pa kagahapon sa tibuok Mindanao lakip na ang ubang bahin sa Visayas.

Tungod niini, masinati ang grabe nga mga pagpanugdog kilat ug kusog nga pagbundak sa uwan hilabi na sa hapon nga mahimong hinungdan sa pagbaha ug pagdahili sa yuta.

Sa latest wind map sa DOST-PAGASA, gilaumang padayon kining mukusog ug mahimong typhoon samtang magtikaduol ug musulod sa PAR ugma.

Posibleng molihok usab kini padulong dinhi sa Eastern Visyas ug sa Bicol region ug posible usab nga mo-recurve pa-Amihan. Kung mu-recurve kini, ubos ang tsansang maglandfall ang bagyo.

Padayong giabisohan sa ahensya ang tanan nga mahimong andam samtang wala musulod ang bagyo sa PAR ug padayong magmonitor sa ilang updates niini.