VSU, mingduyog sa pagselebrar sa World Teacher’s Day

Nagpadayag og dakong pagpasidungog ug pagsaludo ang pamunu-an sa Visayas State University atol sa pagsaulog sa World Teachers’ Day kagahapon, Oktubre singko ning tuiga.

Sa iyang President’s Notes nga gimantala sa VSU website, gibutyag ni VSU President Dr. Edgardo E Tulin ang iyang pag-ila sa dedikasyon ug sakripisyo sa mga magtutudlo aron mahatagan og maayong kaugmaon ang sunod nga henerasyon.

Si Tulin nagkanayon nga dako ang papel sa mga magtutudlo sa katilingban isip mga role models, guidance counselors, second guardians, mind shapers, ug local influencers.

Apan gawas pa niini, gibutyag ni Tulin nga matawag na usab nga frontliners ang mga magtutudlo hilabi na sa pandemya nga gi-atubang karon. Ang mga magtutudlo dako og papel aron batukan ang illiteracy ug ignorance nga resulta sa maong pandemya.

Gipasabot usab ni Tulin ang mga gimbuhaton sa mga magtutudlo ug mga sakripisyo nila hilabi na sa pagpatuman sa new normal modality of teaching. Tungod pud niini, nabutang usab sa peligro sa pagkatakud sa COVID-19 virus ang mga magtutudlo.

Dugang ni Tulin nga sa plano sa sa Commission on Higher Education ug sa Department of Education nga subling hinay-hinay nga pagbalik sa face-to-face nga klase, kinahanglan nga hatagan og prayoridad ang vaccination o pagbakuna sa mga magtutudlo batok sa COVID-19.

Kini aron mas maprotektahan sila sa hulga nga mataptan sa maong sakit.

Angayang masayran nga ang World Teacher’s Day nga gisaulog matag Oktubre singko usa ka tinuig nga kasaulogan sukad pa niadtong dekada nobenta. Kini aron sa pag-ila sa dakong papel sa mga magtutudlo sa tibuok kalibutan. (Buen Josef Andrade)