Baybay City, nakatala og zero COVID-19 Case!
Malipayong gianunsyo sa dakbayan sa Baybay pinaagi sa opisyal nga facebook page niini nga wala nay natalang kaso sa Corona Virus disease kun COVID-19 dinhi.
Kini nagpasabot nga zero na ang local index case, local close contact ug imported returning resident case sa dakbayan sa Baybay.
Gibutyag ang maong kasayuran sa latest COVID-19 Monitoring Update sa City Health Office kagahapon, Abril baynte dos dos mil baynte uno, sa alas syete ang takna sa gabii.
Nunot niini, gipahayag sa mga Baybayanon ang tim-os nga pagpasalamat nila sa Ginoo. Gipasalamatan usab ang City Inter-Agency Task Force for the Management of Emerging Infectious Diseases (IATF-MEID) sa pagpanguna ni Baybay City Mayor, Hon. Jose Carlos L. Cari ug sa tanan nga mga frontliners nga nagtambayayong aron makab-ot ang maong kalampusan.
Bisan paman, gisaysay nila nga naa gihapoy posibilidad nga naay matalang positibo sa dakbayan tungod kay padayon man gihapon ang pagpangdawat dinhi sa mga returning residents.
Maong padayon gipahinumdoman ang tanan nga padayong mag-amping ug musunod sa mga protocols aron malayo sa COVID-19.
