Dakbayan sa Baybay, nagpagawas og schedule sa pagbisita sa mga menteryo alang sa Kalag-Kalag

Aron masiguro nga malikayan ang pagkatap sa COVID-19 hilabi na sa pag-obserbar sa Kalag-Kalag, nagpagawas og palisiya ang dakbayan sa Baybay pinaagi sa City Interagency Task-Force kun IATF.

Nagka-uyon niadtong Lunes, Oktubre dise otso, ang mga ginsakopan sa City IATF-MEID nga i-schedule gihapon ang pagbisita sa mga minteryo aron pagseguro nga masunod gayud ang mga health protocols, hilabi na ang social distancing. Sa Nobyembre uno ug dos usab isirado sa publiko ang mga minteryo.

Magsugod ang schedule sa pagbisita sa Oktubre baynte singko ug mahuman sa Oktubre trayntay uno diin matag adlaw, adunay schedule sa mga barangay nga mao ray makasulod. Ani-a ang kinatibuk-ang schedule sa pagbisita.

Abli ang Catholic Cemetery ug Hipusngo Cemetery gikan sa alas siyete sa buntag hangtod alas siyete sa gabie.

Nunot niini, gi-awhag ang tanan nga mga Baybayanon nga mosunod gayud niini nga schedule sa pagbisita sa minteryo tungod kay adunay magbantay sa mga ganghaan niini.

Gi-awhag usab ang publiko sa pagdala og valid ID aron masuta nga molupyo sila sa usa ka barangay ug nga nagsunod sila sa ilang schedule sa pagbisita.

Segun sa gikasabutan IATF, ang uban nga mga minteryo sa mga kabarangayan ‘ning dakbayan kinahanglan usab nga maghimo og schedule sa pagbisita sa mga katawhan didto sa ilang minteryo. Kini aron pagseguro nga dili mahimong Super Spreader ang mga adlaw sa paghandum sa mga minahal sa kinabuhi nga mitaliwan na sa laing kalibutan.