NiKoPaNi: Adbokasiya sa paghatag og emosyonal nga suporta buot ipakatap dinhi sa VSU

Buot karon ni Visayas State University Guidance Coordinator ug OIC University Registrar Marwen Castañeda nga batasanon sa VSU Community ang usa ka bag-ong matang sa greeting o pagtimbaya hilabi na taliwa sa hulga sa COVID-19 pandemic.

Ang maong pagtimbaya gitawag ni Castañeda nga NiKoPaNi o gipamubo nga mga pulong nga: “Ania Ako Para Nimo”.

Atol sa DYDC Special Talk kagahapon Hunyo baynte nwebe ning tuiga, gibutyag ni Castañeda nga gibase niya ang maong greeting sa usa ka pagtimbaya nga iyang nakat-onan sa usa seminar sa kaulohan.

Matud pa, ang NiKoPaNi nga pagtimbaya gihimo pinaagi sa pagduko sa ulo, pagbutang sa usa ka kamot sa dughan ug ang pagdalit sa laing kamot sa kahinabo samtang nagbatbat sa pulong nga “NiKoPaNi”.

Si Castañeda nagkanayon nga gibase usab niya ang maong pagtimbaya sa sugyot karon ni Marikina District Representative Bayani Fernando nga mao ang “Bating Pinoy”. Kini hilabi na kay naay gisagubang ang nasud nga COVID-19 pandemic ug gipatuman ang social distancing ug gidiscourage ang physical contact.

Dugang ni Castañeda nga buot niya kining mahimong tradisyon ug gesture nga magsugod sa VSU. Kinahanglan matud pa nga mapasbot sa isig ka tawo nga sa oras sa kalisdanan, naay andam nga maminaw ug mutabang kaniya “Ni-a ko para nimo”. Kini matud pa importante hilabi na karong mga panahona nga adunay pandemic ug dako ang posibilidad sa mga anxiety ug depression sa publiko.

Aduna usay lakang si Castañeda nga ma-institutionalize kini ug mahimong kumon nga pagtimbaya dinhi sa tunghaan. Plano usab ni Castañeda nga mahimong adbokasiya ang NiKoPani nga mabuhat usab sa ubang lugar o organisasyon. (Buen Josef C. Andrade)