Trabaho sa VSU, suspendido karong hapon alang sa Kainang Pamilya Mahalaga Day 2020!
September 28, 2020
Suspendido ang trabaho sa Visayas State University kun VSU karong Setyembre baynte otso dos mil baynte, gikan sa alas 3:30 sa hapon.
Kini ubos sa direktiba nga gipagula ni Executive Secretary Salvador Medialdea pinaagi sa Memorandum Circular 80, nga nagdasig sa ubang mga sanga sa gobyerno, independent commissions ug mga pribadong sektor nga isuspende ang trabaho karong Lunes sa alas tres y medya sa hapon aron tugotan ang mga empleyado nga saulogon ang Kainang Pamilya Mahalaga Day.
Matod pa sa Department of the Interior and Local Government, ang Kainang Pamilya Mahalaga Day nagtumong nga awhagon ang mga ginikanan nga kanunay mokaon sa panihapon kauban ang ilang mga anak ug ma-involve kanunay sa kinabuhi nila.
Apan, ang mga ahensya ug departamento nga ubos sa basic health ug security services, disaster preparedness and response, gimandoang padayon gihapon nga magpadayon sa ilang operasyon ug magdalit sa ilang serbisyo.
