Mga hinungdan ngano ubos ang abot sa kalubian sa nasud, gibutyag!

Nalakip man sa mga nag-unang industriya ang coconut farming ug kaylap nga gitanom sa nasud ang kalubian, ubos gihapon ang productivity o pagkamabungahon niini.

Mao kini ang gipadayag ni former Visayas State University (VSU) President ug karon Director for Research sa tunghaan nga si Dr. Jose L. Bacusmo sa sinemanang programa sa National Coconut Research Center nga “Lubi Dabi sa NCRC”/ kagahapon, Oktubre otso, dos mil baynte.

• 

Matod pa ni Dr. Bacusmo, tungod kini sa pipila ka mga rason sama sa pagpasagad sa tanom nga kalubian hilabi na kung nahimutang kini sa kabukiran.

Sagad bisitaon lang kini kung mag-harvest maong dili na mahinloan ang palibot niini. Ang mga sagbot nga niturok, nahimong kailog sa mga nutrients nga alang unta sa lubi.

Aduna usab higayon nga wala mutuman ang mga mag-uuma sa lubi sa mga girekomendang pamaagi sa Philippine Coconut Authority (PCA) sama sa sakto nga kalay-on sa matag punoan.

Dugang pa ni Dr. Bacusmo, lakip usab nga rason niini ang dili pag-abono sa yuta ug ang poor genetics.

Hinuon, gipaambit niya nga bulahan ang rehiyon otso tungod kay aduna kini Baybay Tall, usa ka maayo nga variety sa lubi nga makahatag og taas nga abot.

Kini kasamtangang gi-promote sa PCA.