DILG, gimandoan ang mga LGU nga dili usa i-anunsyo ang brand sa COVID-19 vaccine nga itanyag! – DYDC 104.7 FM
News

DILG, gimandoan ang mga LGU nga dili usa i-anunsyo ang brand sa COVID-19 vaccine nga itanyag!

Gimandoan sa Department of the Interior and Local Government kun DILG ang tanang Local Government Units (LGUs) nga dili dayon i-anunsyo ang tatak o brand sa bakuna kontra COVID-19 nga gamiton sa partikular nga vaccination center.

Kini pinaagi sa usa ka press release nga ilang giluwatan karong adlawa, Mayo baynte, dos mil baynte uno.

Kini subay sa rekomendasyon sa Department of Health humang makadawat og mga report sa mga tawo nga nagpanon sa mga vaccination sites humang masayod sa pihong brand sa bakuna nga ipanghatag didto.

Si DILG Secretary Eduardo M. Año nagkanayon nga ang tanang mga bakuna nga aprobado sa Food and Drug Administration niagi sa usa ka hugot nga proseso busa luwas ug epektibong gamiton.

Dugang pa niya, ang labing maayong bakuna, mao kadtong mga available. Tungod niini, aron malikyan ang  brand preference, wala na gipa-anunsyo ang mga brand sa bakuna nga itanyag sa mga vaccination centers.

Gitin-aw niya nga samtang ang mga LGU gimandoang dili gilayong ipahibalo ang brand sa bakuna, ang indibidwal nga gikatakdang bakunahan, pahibaluon gihapon niini apan didto na sa mismong site.

Sa maong higayon, kuhaon ang iyang pagtugot nga mabakunahan ug kung mobalibad siya, kinahanglan slang iya nga mobalik sa likod sa mga nag-linya.

Gisaysay ni Año nga giila gihapon nila ug girespeto ang katungod sa indibidwal nga masayod sa saktong kasayuran apan gihimo nila ang maong lakang aron mapugngan ang subling pagpundok-pundok o mass gatherings ug tag-as nga linya nga nahinabo kadtong gi-anunsyo daan ang tatak sa bakuna.

Nunot niini, giawhag niya ang publiko nga suportahan ang programa sa pagbakuna sa gobyerno tungod kay katungdanan sa tanan isip mga citizens nga protektahan ang kaugalingon, pamilya, ug ang nasud pinaagi sa pagbakuna.

Samtang, gisaysay ni DILG Undersecretary and Spokesperson Jonathan Malaya nga usa ka advisory ang i-issue sa departamento sa tanan nga mga LGUs pagkahuman sa anunsyo ni Secretary Año.