Duha ka foreign students, gihatagan og full scholarship sa VSU

Isip tipik sa strategic plan for internationalization sa Visayas State University, duha ka mga langyaw nga estudyante ang nahatagan sa tunghaan og scholarship karon nga school year.

Gitawag nga VSU Graduate Fellowship Programs for Foreign Students, ang maong international scholarship grant gipahigayon sa VSU Graduate School diin abli kini sa mga Southeast Asian Nationals ug ubang foreign students gikan sa mga overseas partner universities sa VSU.

Alang sa unang batch sa mga scholars, sila si Bandana A. Regmi sa Nepal ug Dini Andalia Dewi sa Indonesia ang ming-qualify human sa makuting pagpili nga gipahigayon sa Graduate School ug International Affairs Office.

Pormal silang nahimong Viscans niadtong Septembre baynte kwatro atol sa virtual contract signing sa pagsugod sa school year.

Si Ms. Regmi sa Nepal usa ka graduate sa Bachelor of Science in Forestry sa Kathmandu Forestry College ubos sa Tribhuvan University niadtong 2018 ug karon na-enroll sa Master of Science in Forestry.

Sa laing bahin, si Ms. Dewi sa Indonesia nakakuha sa iyang Bachelor of Education major in English sa Syiah Kuala University sa 2013 ug karon nagkuha og Master of Science in Language Teaching.

Ang duha makadawat og libreng school fees, binuwan nga allowance nga 400 US Dollars o 20,000 pesos ug usa ka thesis dissertation support nga 1,000 US Dollars of 50,000 Pesos sa masteral ug 2,000 US Dollars o 100,000 pesos sa doctoral students.

Ang mga aplikante sa scholarship program kinahanglan trayntay singko anyos paubos ug kinahanglan nga ma-admit sa Graduate School isip new student.

Gawas pa sa graduate fellowship program for students, ang VSU Graduate School nagtanyag usab og duha ka laing locally-funded scholarships. Kini mao ang graduate teaching assistantship grant for foreign students ug ang VSU scholarsghip program for honor undergraduates. (Orihinal nga sinuwat ni Neil Bryan B. Fulache)