SOA on Visual Arts sa DYDC FM, pormal nang gilunsad

Pormal nang gilunsad sa Department of Development Communication DDC dinhi sa Visayas State University ang School on the Air kun SOA project niining tuyong makahatag og kahibalo sa mental health ug environmental conservation pinaagi sa visual arts o pagdibuho.

Malampusong gipahigayon niadtong Lunes, Hulyo dose ang Launching sa SOA on Visual Arts for Mental Health and Environment pinaagi sa Facebook Live ug Zoom Online Conferencing App.

Gitambongan ang maong online nga kalihukan sa mga tigdumala sa proyekto ubos sa DDC, mga opisyal sa VSU, mga opisyal sa Department of Education, ug representante sa funding agency nga East-West Center sa Hawaii, USA.

Ang maong educational broadcast naka-angkla sa Sustainable Development Goals kun SDG No. 3 nga Good Health and Well-being ug SDG No. 13 nga Climate Action.

Sulod sa unom ka semana, adunay mahitabo nga modular lessons sa visual arts, mental health ug environmental conservation nga i-sibya ning estasyon ug i-broadcast usab sa official Facebook Page sa VSU. Ang tanang mga lessons susama sa real classroom setup sama sa pagkuha sa attendance, paghatag sa leksyon, paghatag og mga quiz ug exams, ug uban pa.

Ang mga partisipante makadawat og libre nga visual art kits sama sa canvas, inks, ug brushes diin sa katapusan sa leksyon, kinahanglan nga maka-mugna sila og artworks ug balak.

Ang maong educational program ang pinaka-unang matang sa paghatag sa leksyon sa virtual arts gamit ang radyo ug social media.

Muabot sa siyento baynte ka mga partisipante ang na-enrol gikan sa junior ug senior high school students ug teachers sa Music, Arts, Physical Education, and Health (MAPEH). Lakip na usab ang mga estudyante ug magtutudlo nga na-enrol sa Special Program for the Arts sa Department of Education (DepEd). Kini usab gisalmutan sa Baybay City ug Southern Leyte Divisions.

Live nga gi-ere ang SOA on Visual Arts matag Lunes Miyerkules ug Biyernes sa alas tres hangtod alas kwatro sa hapon. (Buen Josef C. Andrade)