Pinakaunang “Model Farm” sa Lungsod sa Abuyog, pormal na nga gilunsad
ABUYOG, LEYTE ― Nagsugod na sa pagpananom ang baynte singko (25) ka mga miyembro sa Canario-Tabigue Irrigators Association Incorporated sa 1,000 metro kwadradong umahan kun Model Farm niini. Ang gihisgutang asosasyon sa mga mag-uuma ang gipiling magdumala sa Department of Agriculture alang sa ilahang tanaman sa utanon nga proyekto sa mga komunidad.
Nagkalainlaing klase ang mga tanom niining umahan sama sa mais, batong, ampalaya, alugbati, talong, ug atsal. Kilid sa tanaman makita ang produksyon sa mushroom ug free-range chicken. Aduna usab kini kaugalingong greenhouse nga gitukod alang sa mga bag-ong tubo nga mga tanom. Nahimutang ang maong model farm sa Sitio Dano, Brgy. Balocawehay, Abuyog, Leyte.
Ang Municipal Agriculture Office sa Abuyog ang nagpaluyo sa mga kinahanglanong gamit ning maong proyekto. Matud pa sa mga mag-uuma, libre ang mga binhi, abono, gwantis, botas, pala ug uban pang gikinahanglan sa maong tanaman. Aron madungagan ang kahibalo sa mga mag-uuma bahin sa agrikultura, mipahigayon usab ang Regional Integrated Agricultural Research Center kon RIARC ug mga pagbansay-bansay. Gipondohan ang proyekto ilalum sa Rice Competitiveness Enhancement Fund gikan pa sa tuig 2019 diin kini nasugdan ug human mapirmahi ang Rice Tarrification Bill.
Sa umaabot nga Enero tuig 2022, malaumon ang presidente sa asosasyon nga maani na nila ang ilang tanom ug mabahin-bahin ang mga halin niini. (Mary Jane Cubian/DYDC-FM Intern)
